धाराशिवमध्ये शिवजयंती मिरवणुकीत तोफेचा स्फोट, एकाचा गळा तर मुलीचा गाल भाजला, दोघे गंभीर जखमी

प्राथमिक माहितीनुसार धाराशिव जिल्ह्यातील वाशी तालुक्यातील पारा गावातील ही घटना आहे. शिवजयंतीचा उत्साह आणि उत्कंठा शिगेला पोहोचलेली असताना मिरवणूक सुरू असतानाच तोफेचा स्फोट झाला. तोफेचा स्फोट नेमका कोणत्या कारणामुळे झाला, हे अद्याप कळू शकलेले नाही.

दुर्घटनेत दोन जण गंभीर जखमी झाले असून अक्षता संतोष भराटे (वय 12, रा. पारा) आणि महेंद्र किंचन गवळी (वय 35, रा. पारा) अशी त्यांची नावे आहेत. महेंद्र किंचन गवळी याच्या गळ्याला जखम आहे तर अक्षता संतोष भराटे हिचा गाल भाजला आहे. धाराशिव च्या शासकीय रुग्णालयात दोघांवरही उपचार सुरू आहेत.

शिवजयंतीची मिरवणूक सुरू असतानाच अचानक स्फोट झाला. त्यामुळे उपस्थित लोकांची भीतीने पांगापाग झाली. स्फोटाच्या आवाजाने परिसरात एकच खळबळ उडाली. स्फोट नेमका कारणामुळे आणि कशामुळे झाला, याचा शोध घेण्यासाठी पोलिसांनी तपास सुरू केला आहे. दरम्यान, या दुर्घटनेने शिवजयंती उत्सवावर दुःखाची छाया पसरली आहे.