दारूची नशा अन् कारल्याचा राग! पोटच्या मुलाने 65 वर्षीय आईचा जीव घेतला; डोंगरगावची धक्कादायक घटना

पोलिसांनी दिलेल्या माहितीनुसार, आरोपीचे नाव जगदीश पेटकुले (वय 36) असून मृत महिलेचे नाव सुमित्राबाई पेटकुले (वय 65 ) आहे. आरोपीची पत्नी सुमारे दोन महिन्यांपूर्वी मुलांना घेऊन माहेरी गेली होती. त्यामुळे जगदीश हा आपल्या आई सुमित्राबाई यांच्यासोबतच राहत होता. काल रात्री घरातील स्वयंपाक त्यांनी लवकर आटोपला. मात्र जेवण करताना कारल्याची भाजी बनवल्याच्या मुद्द्यावरून दोघांमध्ये किरकोळ वाद झाला. हा वाद क्षणातच उग्र रूप धारण करून हिंसक झटापटीत बदलला.

रागाच्या भरात आणि दारूच्या नशेत असलेल्या जगदीशने आईला बेदम मारहाण केली. या अमानुष मारहाणीत सुमित्राबाई गंभीर जखमी झाल्या. त्यांच्या डोक्याला, छातीला आणि शरीराच्या इतर भागांना गंभीर दुखापत झाली. मारहाणीनंतर त्या रक्ताच्या थारोळ्यात कोसळल्या. घटनेनंतर शेजाऱ्यांनी आरडाओरड ऐकून धाव घेतली असता सुमित्राबाई यांचा जागीच मृत्यू झाल्याचे निदर्शनास आले.

घटनेची माहिती मिळताच स्थानिक पोलिसांनी तत्काळ घटनास्थळी धाव घेत पंचनामा केला. मृतदेह शवविच्छेदनासाठी पाठविण्यात आला आहे. प्राथमिक तपासात आरोपी दारूच्या नशेत असल्याचे स्पष्ट झाले असून, दारूच्या व्यसनामुळेच त्याचा स्वभाव आक्रमक बनल्याची माहिती स्थानिक नागरिकांकडून मिळत आहे. या प्रकरणी पोलिसांनी आरोपी जगदीश पेटकुले याला ताब्यात घेऊन अटक केली असून त्याच्याविरुद्ध खुनाचा गुन्हा दाखल करण्यात आला आहे.

या घटनेमुळे डोंगरगाव परिसरात तीव्र संताप व्यक्त केला जात असून, आई-मुलाच्या नात्याला काळिमा फासणाऱ्या या घटनेने सर्वत्र हळहळ व्यक्त होत आहे. पोलिसांकडून पुढील तपास सुरू आहे.