चाकणकर म्हणाल्या, स्वेच्छेने राजीनामा, पण सुनेत्रा पवारांनी तोंडावर पाडलं, थेट मुद्द्याला हात!

मुंबई : नाशिकचा भोंदूबाबा अशोक खरात याच्या अध्यात्मिक रुपाला भुलून रुपाली चाकणकर यांनी त्याला गुरू मानले. त्याची पाद्यपूजा करीत 'गुरूमाऊली' म्हणत भावी जीवनाचा मंत्र त्याच्याकडून घेतला. अगदी त्याला पांडुरंगाचे रूप मानून देवाप्रमाणे त्याला पुजले. मात्र त्याच्याबाबत काळे सत्य समोर येताच हात वर करून आपण 'मुरलेल्या राजकारणी' आहोत, हे त्यांनी सिद्ध केले. त्याच्या काळ्या धंद्यांपायी रुपाली चाकणकर यांना महिला आयोगाच्या अध्यक्षपदाचा त्याग करावा लागला. सर्व महाराष्ट्रभरातून त्यांच्यावर टीकेचे आसूड ओढले गेले. त्यांच्या राजीनाम्याची मागणी विरोधकांसह सत्ताधारी पक्षातील नेत्यांनी केली. त्याउपर मुख्यमंत्री फडणवीस यांनीही लगोलग राजीनामा द्या, असा स्पष्ट दट्ट्या दिल्यानंतर स्वेच्छेने राजीनामा देत असल्याचे चाकणकर यांनी हुशारीने सांगितले खरे. परंतु राष्ट्रवादीच्या अध्यक्षा, उपमुख्यमंत्री सुनेत्रा पवार यांनी मात्र रुपाली चाकणकर यांनी कोणत्या कारणामुळे राजीनामा दिला, राजीनामा देताना काय चर्चा झाली, हेच जनतेला सांगून त्यांना अप्रत्यक्षपणे तोंडावर पाडले.