Sindhudurga Local Body Election : मोठी बातमी! कोकणात मोठी घडामोड, राणे बंधू आमने-सामने, तर शिंदे-ठाकरेंची युती!

सिंधुदुर्ग जिल्ह्यातील कणकवली नगरपंचायत निवडणुकीच्या पार्श्वभूमीवर स्थानिक राजकारणात नव्या घडामोडी वेगाने घडल्या आहेत. कणकवली नगरपंचायत निवडणूक अनपेक्षित वळण घेतले आहे. शहर विकास आघाडीच्या उमेदवारांना शिंदे गटाच्या शिवसेनेने जाहीर पाठिंबा देताच स्थानिक राजकारणात खळबळ उडाली आहे. ठाकरे गटाचे जिल्हाप्रमुख आणि शहर विकास आघाडीचे प्रमुख उमेदवार संदेश पारकर यांच्या उमेदवारी अर्ज दाखल करण्यासाठी शिंदे गटाचे उपनेते संजय आंग्रे आणि माजी आमदार राजन तेली स्वतः उपस्थित राहिले. संदेश पारकर हे नगराध्यक्षपदासाठी उमेदवार आहेत. या शहर विकास आघाडीच्या माध्यमातून शिवसेना शिंदे आणि ठाकरे गट एकत्र आले आहेत.

कणकवलीतील निवडणूक चित्र अधिकच रोचक बनले आहे. भाजपचे आमदार नितेश राणे यांच्या राजकीय प्रभावाला थोपवण्यासाठी विविध पक्ष आणि स्थानिक नेते एकाच मंचावर आले आहेत. शहर विकास आघाडीला मिळालेला शिंदे गटाचा पाठिंबा हा त्याच धोरणाचा भाग मानला जात आहे. या निवडणुकीत ‘राणे विरुद्ध राणे’ असाही सामना रंगण्याची चिन्हे आहेत.

भाजपचे आमदार नितेश राणे आणि त्यांच्या विरोधातील पॅनलमध्ये सक्रिय भूमिका घेणारे निलेश राणे यांच्या आमनेसामने येण्याची शक्यता व्यक्त केली जात आहे. कणकवलीतील या नवीन राजकीय मैत्रीमुळे नगरपंचायत निवडणुकीचे चित्र पूर्णपणे बदलले असून, येत्या काही दिवसांत आणखी नाट्यमय घडामोडी घडण्याची चिन्हे दिसत आहेत. नितेश राणे हे भाजपचे आमदार आहेत. तर, निलेश राणे हे शिवसेना शिंदे गटाचे आमदार आहेत. निलेश राणे यांनी ठाकरे गटाचे वैभव नाईक यांचा पराभव केला होता. तर, दुसरीकडे राणे विरुद्ध राणे असे दिसत असताना दोन कट्टर राजकीय प्रतिस्पर्धी असलेले वैभव नाईक आणि निलेश राणे हे एकाच आघाडीत आले आहेत.

संदेश पारकर यांचा उमेदवारी अर्ज दाखल करण्याच्या दिवशीच सर्वपक्षीय नेत्यांची उपस्थिती पाहून ही लढत अधिकच चुरशीची होणार, हे स्पष्ट झाले आहे.