साडी असो वा ड्रेस, मोबाईल राहील सेफ, मुंबईकर तरुणीची भन्नाट आयडिया, आता फेमस ब्रँड!

आकांक्षाला या मोबाईल बेल्टची कल्पना सोशल मीडियावर व्हिडिओ स्क्रोल करताना आली. चीनमधील एका व्हिडिओमध्ये दाखवलेला बेल्ट पाहून तिच्या मनात विचार आला, “भारतीय स्त्रियांच्या साडी किंवा पारंपरिक ड्रेससोबत वापरता येईल असा बेल्ट का बनवू नये?” कारण बहुतेक वेळा ड्रेस किंवा साडीत खिसे नसल्यामुळे महिलांना मोबाईल ठेवण्यासाठी स्वतंत्र पर्स घ्यावी लागते. हाच दैनंदिन त्रास लक्षात घेऊन आकांक्षाने खास भारतीय पोशाखांना साजेशा डिझाइनमध्ये मोबाईल बेल्ट तयार केला.

हा बेल्ट मोत्यांपासून आणि वेगवेगळ्या वेगन मटेरियलपासून बनवला जातो. त्यामध्ये सौंदर्यासोबतच सुरक्षिततेलाही विशेष महत्त्व दिलं आहे. मोबाईल जवळ ठेवताना चोरी किंवा गहाळ होण्याची शक्यता लक्षात घेऊन आकांक्षाने हा बेल्ट मजबूत आणि सुरक्षित बनवला आहे.

आज तिच्या या ब्रँडला सोशल मीडिया, ऑनलाईन शॉपिंग वेबसाईट्स आणि विविध एक्झिबिशन्समधून चांगला प्रतिसाद मिळतो आहे. सध्या तिच्या वार्षिक कमाईचा आकडा सुमारे पाच ते सात लाख रुपयांपर्यंत पोहोचला आहे.