'आज हंगामा होगा, 12 बजे ब्लास्ट होगा' संजय राऊतांच्या घराबाहेर कारवर मेसेज, मुंबईत खळबळ

मिळालेल्या माहितीनुसार, ठाकरे गटाचे खासदार संजय राऊत यांच्या घराबाहेर एका धुळखात पडलेल्या मारुती सुझुकी वॅगनॉर कारवर हा मजकूर लिहिला आहे. 'आज हंगामा होगा, आज रात्र १२ बजे ब्लास्ट होगा' असं या कारच्या काचेवर लिहिलं आहे. तसंच कारच्या पाठीमागील काचेवर 'CST में बॉम्ब ब्लास्ट होगा' असा मजकूर लिहून स्माईलीचा इमोजी आहे.

हा प्रकार समोर आल्यानंतर तातडीने याची माहिती पोलिसांना देण्यात आली. बॉम्ब पथक आणि मुंबई पोलीस संजय राऊत यांच्या घरी दाखल झाले आहे. एकीकडे राज्यात निवडणुकांची धामधूम सुरू आहे. तर दुसरीकडे नववर्षाच्या स्वागतासाठी सर्वत्र गर्दी वाढत चालली आहे. अशातच अशा प्रकारच्या मेसेजमुळे खळबळ उडाली आहे. पोलीस दलाने या मेसेजचही गांभीर्याने दखल घेतली आहे. राऊत यांच्या घरी मुंबई पोलीस आणि बॉम्बशोधक पथक दाखल झाले आहे.