Mumbai Local: मुंबईकर रविवारी खोळंबा होणार, मध्य रेल्वेवर मेगाब्लॉक, कसं असेल वेळापत्रक?

मध्य रेल्वेच्या मुंबई विभागातील मुख्य मार्गावर माटुंगा ते मुलुंडदरम्यान अप आणि डाऊन जलद मार्गावर हा ब्लॉक घेण्यात येणार आहे. हा ब्लॉक सकाळी 11.05 ते दुपारी 3.45 या वेळेत असेल. या कालावधीत सीएसएमटी येथून सकाळी 10.36 ते दुपारी 3.10 दरम्यान सुटणाऱ्या डाऊन जलद मार्गावरील लोकल माटुंगा स्थानकात डाऊन धिम्या मार्गावर वळवण्यात येतील. या लोकल माटुंगा ते मुलुंडदरम्यान त्यांच्या नेहमीच्या थांब्यांवर थांबतील. तसेच ठाणे येथून सकाळी 11.03 ते दुपारी 3.38 दरम्यान सुटणाऱ्या अप जलद लोकल मुलुंड स्थानकात अप धिम्या मार्गावर वळवण्यात येतील. त्या लोकल मुलुंड ते माटुंगा दरम्यान सर्व निर्धारित स्थानकांवर थांबून नंतर पुन्हा अप जलद मार्गावर जातील.

हार्बर रेल्वे मार्गावरही रविवारी मोठा ब्लॉक घेण्यात येणार आहे. सीएसएमटी ते चुनाभट्टी आणि वांद्रे डाऊन मार्गावर सकाळी 11.40 ते दुपारी 4.40 दरम्यान ब्लॉक असेल. याच काळात अप हार्बर मार्गावर सकाळी 11.10 ते दुपारी 4.10 दरम्यान वाहतूक बंद राहणार आहे. या ब्लॉकमुळे सीएसएमटी येथून सकाळी 11.16 ते दुपारी 4.47 दरम्यान वाशी, बेलापूर आणि पनवेलकडे जाणाऱ्या डाऊन लोकल तसेच सकाळी 10.48 ते संध्याकाळी 4.43 दरम्यान वांद्रे आणि गोरेगावकडे जाणाऱ्या डाऊन लोकल सेवा रद्द करण्यात आल्या आहेत. प्रवाशांच्या सोयीसाठी पनवेल ते कुर्ला दरम्यान विशेष लोकल सेवा चालवण्यात येणार आहेत.