Mumbai Best Bus: मुंबईतील प्रवाशांसाठी महत्त्वाची बातमी, तब्बल 30 बेस्ट बस मार्गांमध्ये बदल, असे असतील नवीन मार्ग

Reported by:Namita Suryavanshi
Published by:Mohan Najan

Last Updated:May 30, 2025 9:11 AM IST

लोकल ट्रेननंतर बेस्ट बस ही मुंबईकरांची लाईफलाईन म्हटली जाते. गेल्या काही दिवसांपूर्वी बसचे दुप्पट भाडे वाढले आहे, तर आता पुन्हा एकदा बेस्टने नवीन निर्णय घेऊन बेस्ट सेवेत बदल करण्यात आला आहे.

मुंबई : लोकल ट्रेननंतर बेस्ट बस ही मुंबईकरांची लाईफलाईन म्हटली जाते. गेल्या काही दिवसांपूर्वी बसचे दुप्पट भाडे वाढले आहे, तर आता पुन्हा एकदा बेस्टने नवीन निर्णय घेऊन बेस्ट सेवेत बदल करण्यात आला आहे. ही मुंबईकरांच्या दैनंदिन प्रवासाला अधिक सुलभ, आरामदायक आणि कार्यक्षम बनवण्यासाठी बृहन्मुंबई इलेक्ट्रिक सप्लाय अँड ट्रान्सपोर्ट (बेस्ट) उपक्रमाने एक व्यापक निर्णय घेतला आहे. 1 जून 2025 पासून शहरातील तब्बल 30 बस मार्गांमध्ये महत्त्वपूर्ण बदल केले जाणार आहेत. यामध्ये नवीन वातानुकूलित बस मार्ग सुरू करणे, विद्यमान बस मार्गांचे क्रमांक व रचना बदलणे, तसेच वेळापत्रकात सुधारणा यांचा समावेश आहे.

बेस्टने अलीकडेच भाडेवाढ जाहीर केल्यानंतर सेवा सुधारण्याचे प्रयत्न सुरू केले आहेत. सध्या बेस्टकडे 2,700 स्वमालकीच्या आणि भाडेतत्त्वावरील बसगाड्या असून, यामधून दररोज सुमारे 30 लाख प्रवासी प्रवास करतात. नव्या नियोजनामुळे मेट्रो आणि रेल्वे स्थानकांशी बससेवा अधिक चांगल्या प्रकारे जोडली जाईल आणि कामाच्या ठिकाणापर्यंत पोहोचणेही सोयीचे होणार आहे.

सासरच्या लोकांमुळे बदललं नशीब! डोंगरावर राहणाऱ्या 2 सूना झाल्या YouTube स्टार, कमाई आहे लाखोंमध्ये...

नवीन वातानुकूलित बस सेवा व श्रेणी सुधारणा:

1) मार्ग क्रमांक ए-25: सध्या बँकबे आगार ते कुर्ला दरम्यान धावणाऱ्या या वातानुकूलित बसचा शेवटचा थांबा आता राणी लक्ष्मीबाई चौक असेल.

2) बस क्रमांक 44: काळा चौकी ते वरळी आगार बसमार्ग सुधारित होऊन वातानुकूलित सेवा म्हणून ए-44 या क्रमांकाने ओळखला जाईल.

3) मार्ग क्रमांक 56: वरळी आगार ते बेसावे यारी रोडदरम्यान धावणाऱ्या या मार्गावर रविवारी वातानुकूलित बस धावेल. इतर दिवशी नियमित सेवा राहील.

4) 125 क्रमांकाची बस: ही सेवा पूर्णतः वातानुकूलित करण्यात येणार असून ए-125 म्हणून चालवली जाईल.

बस मार्ग विस्तारणे व सुधारणा:

1) सी-71 बस: माहीम ते मीरा रोड पूर्व या मार्गाचा विस्तार काला किल्ला बस आगारापर्यंत करण्यात येणार आहे. मार्गात सेनापती बापट मार्ग, रहेजा हॉस्पिटल, बनवारी कंपाउंड हे थांबे समाविष्ट असतील.

2) मार्ग क्रमांक 11 लिमिटेड: नेव्ही नगर ते वांद्रे कॉलनी या मार्गातील बस डॉ. बाबासाहेब आंबेडकर रोडवरून लालबाग उड्डाणपुलावरून धावणार. यामुळे जिजामाता उद्यान (राणी बाग), जयहिंद सिनेमा, लालबाग येथील थांबे रद्द होतील.

3) बस क्रमांक 25: प्रबोधनकार ठाकरे उद्यान ते विहार सरोवर या मार्गाला नवीन क्रमांक देत आता बस क्रमांक 29 म्हणून ओळखले जाईल.

4) मार्ग क्रमांक 79: सांताक्रूझ आगार ते गोराई आगारापर्यंत जाणारा मार्ग आता चारकोप येथे संपेल.

सेवेच्या वेळा व चालना दिवसात बदल:

मार्ग क्रमांक ए-89: मंत्रालयातून चालणारी ही सेवा फक्त सोमवार ते शनिवार या दिवशीच उपलब्ध असेल. तसेच मार्ग क्रमांक 124: कुलाबा बस स्थानक ते वरळी आगार या मार्गावर सध्या रविवारी वेगळी रचना असते, पण आता ही सेवा संपूर्ण आठवडाभर एकसंध स्वरूपात चालेल.

बदलांचा परिणाम काय होईल?

गर्दीच्या वेळेत मेट्रो स्थानकांना व व्यावसायिक भागांना थेट जोडणी मिळेल. तसेच प्रवाशांना वेगाने पोहोचता येईल, मार्ग सरळ होतील.

वातानुकूलित सेवांमुळे प्रवास अधिक आरामदायक शक्य होईल. अधिकाधिक बस वातानुकूलित व इलेक्ट्रिक करण्याचा प्रयत्न करत आहे. 1 जून पासून हे सर्व बदल होणार आहेत.

view comments

Location :

Mumbai,Maharashtra

First Published :

May 30, 2025 9:11 AM IST

Mumbai Best Bus: मुंबईतील प्रवाशांसाठी महत्त्वाची बातमी, तब्बल 30 बेस्ट बस मार्गांमध्ये बदल, असे असतील नवीन मार्ग