आधी कपडे काढायला लावले, मग अश्लील.., रेड मारायला गेलेल्या व्यक्तीचं थायलंडच्या तरुणीसोबत नको ते कृत्य

मिळालेल्या माहितीनुसार, गेल्या महिन्यात २७ ऑक्टोबर रोजी चेंबूरच्या युवान थाई स्पावर पीटा अंतर्गत कारवाई करण्यात आली होती. या कारवाईत ग्राहक, मॅनेजर तसेच कर्मचाऱ्यांवर कारवाई करत थायलंडच्या तरुणींसह महिलांना ताब्यात घेतलं होतं. त्यानंतर सर्व महिलांना सुधारगृहात पाठवण्यात आलं होतं.

या घटनेच्या महिनाभरानंतर या रेडमधील ३८ वर्षीय महिला स्पा थेरेपीस्टने २४ तारखेला सांताक्रूझ पोलीस ठाण्यात धाव घेतली. थेरेपीस्टच्या तक्रारीनुसार, घटनेच्या दिवशी आरोपीनं सायंकाळी पावणे सहा वाजता एक तासासाठी डीप टिश्यू स्पा थेरेपी बुक केली. ठरल्याप्रमाणे संबंधित व्यक्तीला बुक केलेल्या थेरपीची माहिती देऊन, मसाज देत असताना त्याने अश्लील स्पर्श करण्यास सुरुवात केली. त्याला विरोध करताच, त्याने धमकाविण्यास सुरुवात केली. तसेच मी पॉवरफुल व्यक्ती असून पोलिसांचा खास असल्याचे सांगून खोट्या केसमध्ये अडकवण्याची भीती दाखवली.

संबंधित ग्राहकासोबत शारीरिक संबंधाला नकार दिला. मात्र, इथे सेक्स रॅकेट सुरू असल्याचे माहिती असल्याचे सांगून जबरदस्ती करण्याचा प्रयत्न केला. त्याने विवस्त्र केले. त्यानंतर, तीन अनोळखी व्यक्त्ती खोलीत आले. त्यांनी, नग्न अवस्थेमधील फोटो व व्हिडीओ काढले. त्यानंतर संबंधित व्यक्ती आणि अन्य तीन साथीदार निघून गेल्याचा आरोप केला. त्यानुसार, सांताक्रूझ पोलिसांनी त्यांच्या जबाबावरून झिरो एफआयआर नोंदवत चौकशी सुरू केली आहे. विशेष म्हणजे छापा टाकण्यापूर्वी आरसीएफ पोलिसांनी कारवाईसाठी बोगस ग्राहक म्हणून याच व्यक्तीला पाठवलं होतं.