नवी मुंबईकरांसाठी आनंदाची बातमी! मोरबे धरण भरले तब्बल 93 टक्के, असा होणार फायदा...

नवी मुंबई : नवी मुंबईकरांसाठी एक आनंदाची बातमी आहे. मोरबे धरण आता 93 टक्के भरल्याने नवी मुंबईकरांची पाण्याची चिंता मिटली आहे. मोरबे धरण परिसरात 9 ऑगस्टपर्यंत तीन वर्षांतील सर्वाधिक पावसाची नोंद झाली आहे. त्यामुळे हे धरण आता 93.08 टक्के भरले आहे.

यावर्षी पाऊस उशिरा सुरू झाला. त्यामुळे जूनअखेरीस 50 दिवस पुरेल इतकाच पाणीसाठा धरणात होता. त्यामुळेच पावसाच्या सुरुवातीला पाणी कपात करण्याची वेळ आली. मात्र, जुलै महिन्यात आणि ऑगस्टच्या सुरुवातीलासुद्धा पावसाने दमदार हजेरी लावली. यामुळे आता धरणाची पातळी झपाट्याने वाढली आहे. धरण पूर्ण भरण्यासाठी 1.38 मीटर पातळी शिल्लक राहिली आहे. यामुळे आता पुढील तब्बल 306 दिवस पुरेल इतका पाठीसाठा मोरबे धरणात शिल्लक आहे. म्हणून आता नवी मुंबईकरांची संपूर्ण वर्षभरासाठीची चिंता मिटली आहे.