Mumbai Crime: म्हाडाचं घर देण्याच्या नावाखाली तिघांना लाखोंचा गंडा, महिलेविरोधात गुन्हा दाखल

फसवणुकीच्या प्रकरणात मुंबईतल्या अंधेरीतील रहिवासी 52 वर्षीय रमेश सावंत यांनी पोलिसांत तक्रार दाखल केली. सावंत हे अंधेरी येथील एका खासगी कंपनीत नोकरीला आहेत. त्यांची पत्नी दीप्ती सावंत 2019 साली अंधेरी पश्चिमेतील सुशिला टेक्सटाईल कंपनीत काम करत असताना पूनम पाटगावे हिच्याशी तिची ओळख झाली होती. या ओळखीचा गैरफायदा घेत पूनमने फेब्रुवारी 2024 मध्ये पत्रकार कोट्यातून म्हाडामध्ये घर मिळवून देण्याचे आमिष दाखवले. हे आमिषच रमेशला चांगलंच महागात पडलं आहे.

पत्रकार कोट्यातून मिळणाऱ्या घराची किंमत 15 लाख असून तुम्हाला सुरूवातीला प्रत्येकी दीड लाख रूपये भरावे लागतील, असे पूनमने सांगितले. पूनमच्या सांगण्यावर विश्वास ठेवून रमेश सावंत, त्याचा मेव्हणा रोहन कदम आणि मित्र दीपक भगत यांनी आपले आवश्यक कागदपत्रे व्हॉट्स ॲपवर पाठवले. डॉक्युमेंट पाठवल्यानंतर मार्च 2024 मध्ये जोगेश्वरीतल्या एका हॉटेलमध्ये रमेशसोबत त्याच्या मेव्हण्यासह आणखी एकाने पूनमला एकूण 04.50 लाख रुपये रोख स्वरूपात दिले, असे तक्रारीत नमूद करण्यात आले आहे.

यानंतर म्हाडा घरासाठी जीएसटी म्हणून प्रत्येकी 60 हजार रुपये भरावे लागतील, असे सांगत पूनमने तिघांकडून एकूण 01.80 लाख रुपये ऑनलाइन पद्धतीने स्वीकारले. मात्र पैसे मिळाल्यानंतर ती सतत टाळाटाळ करू लागली. काही दिवसांनी चारकोप परिसरात घर लागल्याचे सांगून तिने बनावट लॉटरी आयडी क्रमांक व्हॉट्स ॲपवर पाठवले. त्या आयडींचे कोणतेही अधिकृत ऑनलाइन तपशील देण्यास तिने नकार दिल्याने तिघांना संशय आला. अखेर फसवणूक झाल्याची खात्री झाल्यानंतर त्यांनी वाकोला पोलिस ठाण्यात तक्रार दाखल केली. पोलिसांनी गुन्हा नोंदवून आरोपी महिलेचा शोध सुरू केला आहे.