Mumbai Local : बोगद्यातून सुसाट प्रवास! मुंबई उपनगरी रेल्वेचा 400 किमीचा टप्पा पार; पनवेल-कर्जत लोकल मार्ग कधी होणार खुला?

सध्या छत्रपती शिवाजी महाराज टर्मिनस (CSMT) येथून कर्जतला जाण्यासाठी केवळ कल्याणमार्गे पर्याय उपलब्ध आहे. मात्र, हा नवीन मार्ग सुरू झाल्यानंतर प्रवाशांना पनवेलमार्गेही कर्जतला जाण्याचा दुसरा जलद पर्याय मिळेल. या मार्गावर पनवेल, चिखले, पोयंजे (मोहापे), चौक आणि कर्जत अशी पाच स्थानके असणार आहेत. याचा मोठा फायदा नवी मुंबई आणि कर्जत परिसरातील प्रवाशांना होणार आहे.

या प्रकल्पाचे सुमारे ८५ टक्के काम पूर्ण झाले असून, उर्वरित काम पावसाळ्यापूर्वी संपवण्याचे नियोजन आहे. या मार्गावर तीन महत्त्वाचे बोगदे असून त्यात २.६ किमी लांबीच्या 'वावरले' या मुंबई उपनगरी रेल्वेवरील सर्वाधिक लांबीच्या बोगद्याचा समावेश आहे. विशेष म्हणजे, या बोगद्यांमध्ये पहिल्यांदाच खडीमुक्त रुळांचा वापर करण्यात आला असून मजबूतीसाठी काँक्रिटचा आधार देण्यात आला आहे.