Panvel News : ''रिक्षा बंद पडली'' असे खोटे सांगितले अन्...; पनवेलमध्ये भररस्त्यात महिलेचा केला घात; घडलं काय?

मिळालेल्या माहितीनुसार,नवीन पनवेलमध्ये एका 36 वर्षीय महिलेवर चाकूने हल्ला करून तिचे सोन्याचे दागिने, मोबाईल आणि रोख रक्कम लुटल्याची धक्कादायक घटना बुधवारी संध्याकाळी घडली.

संगीता भोईर या करंजाडे आर-3 येथे राहतात. त्या सायंकाळी साडेसहा वाजण्याच्या सुमारास मार्केटमधून घरी जाण्यासाठी उरण नाका येथील गणेश स्वीटजवळील रिक्षा स्टॉपवर आल्या होत्या. त्या एका रिक्षात बसून करंजाडेच्या दिशेने निघाल्या. करंजाडे आर-4 मधील सत्य ट्रायडेंट इमारतीजवळील सर्व्हिस रोडवरील नाल्याच्या पुलावर पोहोचल्यावर रिक्षाचालकाने रिक्षा बंद पडल्याचे सांगितले. तो रिक्षा ढकलतो असे सांगून खाली उतरला.

यानंतर त्याने अचानक पाठीमागून संगीता यांच्या गळ्यावर चाकूने वार केला. घाबरलेल्या संगीता यांनी स्वतःचा बचाव करण्यासाठी रिक्षातून खाली उतरून पळण्याचा प्रयत्न केला. मात्र आरोपीने त्यांच्या छाती आणि पायावरही वार करत गळ्यातील मंगळसूत्र, चेन, मोबाईल आणि पैशांची पर्स जबरदस्तीने हिसकावून घेतली.