मध्यरात्रीची वेळ अन् अचानक लोको पायलटच्या समोर RDX चा भयंकर स्फोट, रेल्वे ट्रॅकचे तुकडे, इंजिनचा चुराडा

सरहिंद परिसरातील खानपूर फाटकाजवळून एक मालगाडी नवीन रेल्वे लाईनवरून जात होती. ही लाईन सध्या ट्रायलवर (चाचणीवर) होती. मालगाडीचे इंजिन फाटकाजवळ पोहोचताच अचानक 'RDX' चा मोठा स्फोट झाला. स्फोट इतका शक्तिशाली होता की मालगाडीचे इंजिन रुळावरून खाली उतरले आणि लोको पायलट (चालक) गंभीर जखमी झाला. त्याच्या डोक्याला आणि शरीराला गंभीर इजा झाली असून, त्याला तातडीने स्थानिक रुग्णालयात दाखल करण्यात आले आहे.

सुदैवाने ही मालगाडी होती आणि ती रिकामी होती. रेल्वे सूत्रांनी दिलेल्या माहितीनुसार, जर या ट्रॅकवरून एखादी प्रवासी ट्रेन (Passenger Train) जात असती, तर शेकडो प्रवाशांचे प्राण गेले असते. हा स्फोट केवळ अपघात नसून तो रेल्वे उडवण्याचा एक सुनियोजित कट होता, असे प्राथमिक तपासात समोर आले आहे.

२६ जानेवारी अवघ्या दोन दिवसांवर असताना घडलेल्या या घटनेने सुरक्षा यंत्रणांच्या पायाखालची वाळू सरकली आहे. पोलिसांनी संपूर्ण परिसराला वेढा घातला असून फॉरेन्सिक टीमला पाचारण करण्यात आले आहे. प्राथमिक अंदाजानुसार हा एक 'दहशतवादी हल्ला' असू शकतो, मात्र अधिकृत दुजोरा मिळणे अद्याप बाकी आहे.

या घटनेनंतर पंजाब काँग्रेसचे अध्यक्ष अमरिंदर सिंह राजा वडिंग यांनी सोशल मीडियावर पोस्ट करत राज्य सरकारवर टीका केली आहे. "सार्वजनिक ठिकाणी RDX चा वापर होणे हा सामान्य गुन्हा नाही. हा पंजाबला अस्थिर करण्याचा आणि भीती पसरवण्याचा जाणीवपूर्वक केलेला प्रयत्न आहे," असे त्यांनी म्हटले आहे.