1100 कोटींच्या क्लबमध्ये एन्ट्री, तरीही 'धुरंधर'ला मोठा लॉस! 10 मिलियन डॉलर्सवर सोडावं लागलं पाणी, नेमकं काय घडलं?

मुंबई: रणवीर सिंहचा अभिनय आणि आदित्य धरचं दिग्दर्शन, त्यामुळे पडद्यावर धमाका होणार हे नक्की होतं. 'धुरंधर' या चित्रपटाने जगभरात १००० कोटींचा आकडा पार करून नवा इतिहास रचला आहे. पण असं असलं तरीही, धुरंधरला मोठा तोटा सहन करावा लागला आहे.

चित्रपटातील अँटी-पाकिस्तान आशयामुळे मध्य-पूर्व देशांनी या चित्रपटावर बंदी घातली, परिणामी निर्मात्यांना तब्बल ९० कोटी रुपयांच्या म्हणजेच १० दशलक्ष डॉलर्सच्या कमाईवर पाणी सोडावं लागलं आहे.

'धुरंधर'चे ओव्हरसीज डिस्ट्रिब्युटर प्रणब कपाडिया यांनी या नुकसानीवर भाष्य केलं आहे. आखाती देश हे भारतीय ॲक्शन चित्रपटांसाठी सोन्याची खाण मानले जातात.

कपाडिया म्हणतात, "आम्ही किमान १० दशलक्ष डॉलर्सचे नुकसान सोसले आहे. आखाती देशांमध्ये भारतीय ॲक्शन सिनेमांची क्रेझ प्रचंड असते. 'फायटर' चित्रपटाच्या वेळीही असाच अनुभव आला होता. प्रत्येक देशाचे आपले नियम असतात आणि आपण त्याचा आदर केला पाहिजे, पण एका मोठ्या प्रेक्षकवर्गाला चित्रपट पाहता आला नाही, याची खंत वाटते."

एक मजेशीर गोष्ट म्हणजे, आखाती देशात चित्रपट प्रदर्शित झाला नसला तरी तिथल्या चाहत्यांनी 'धुरंधर' पाहण्याची जिद्द सोडली नाही. डिसेंबरचा काळ सुट्ट्यांचा असल्याने अनेक आखाती नागरिक युरोप किंवा अमेरिकेत सुट्ट्यांचा आनंद घेत होते.

कपाडिया सांगतात, "खूप लोक जे सुट्ट्यांसाठी परदेशात गेले होते, त्यांनी लंडन किंवा अमेरिकेत जाऊन 'धुरंधर' पाहिला. सुदैवाने चित्रपटाच्या प्रदर्शनाची वेळ ख्रिसमसच्या सुट्ट्यांमध्ये आल्याने, दुबईत चित्रपट पाहू न शकलेल्या प्रेक्षकांनी परदेशात जाऊन रणवीरचा स्वॅग अनुभवला."

आदित्य धर दिग्दर्शित हा चित्रपट दोन भागांत विभागलेला एक हाय-व्होल्टेज स्पाय ॲक्शन ड्रामा आहे. कराचीतील लियारी भागातील पार्श्वभूमीवर आधारित या चित्रपटात रणवीर सिंह मुख्य भूमिकेत आहे. त्याला साथ देण्यासाठी अक्षय खन्ना, अर्जुन रामपाल, संजय दत्त आणि आर. माधवन यांसारख्या दिग्गज कलाकारांची फौज मैदानात उतरली आहे. सध्या या चित्रपटाने जगभरात ११०० कोटींची कमाई केली आहे.

'धुरंधर'चा पहिला भाग सुपरहिट ठरल्यानंतर आता सर्वांना वेध लागले आहेत ते दुसऱ्या भागाचे. २०२६ च्या ईदला या चित्रपटाचा दुसरा भाग प्रदर्शित होणार आहे. पहिल्या भागाला मिळालेला तुडुंब प्रतिसाद पाहता, चित्रपटाचा दुसरा भाग काय कमाल करून दाखवणार, याकडे सगळ्यांचं लक्ष लागलं आहे.