'महाभारत'मधील तो सीन करताना ढसाढसा रडली अभिनेत्री, स्वत:ला केलेलं खोलीत बंद, असं काय घडलेलं?

बी. आर. चोप्रा हे हिंदी सिनेमा आणि दूरदर्शन विश्वातील असं नाव आहे, ज्यांचे योगदान कायम स्मरणात राहील. त्यांनी अनेक चित्रपट दिले असले तरी भारतीय दूरदर्शनला त्यांनी एक अशी ऐतिहासिक मालिका दिली, जिने लोकप्रियतेच्या बाबतीत रामानंद सागर यांच्या ‘रामायण’लाही टक्कर दिली.

बी.आर. चोप्रा यांच्या 'महाभारत'पुढे आजच्या पौराणिक मालिका फिक्या वाटतात. या मालिकेतील पात्रे आजही प्रेक्षकांना आठवतात. 'महाभारत'मध्ये नितीश भारद्वाज यांनी श्रीकृष्ण तर मुकेश खन्ना यांनी भीष्म पितामहांची अजरामर भूमिका साकारली. त्याचप्रमाणे द्रौपदीच्या भूमिकेत रूपा गांगुली यांनीही विशेष ओळख मिळवली. त्यांच्या प्रभावी अभिनयामुळे द्रौपदीचे पात्र घराघरात पोहोचले आणि त्या काळात लोक त्यांना प्रत्यक्ष द्रौपदीच समजू लागले होते.

महाभारतात द्रौपदी हे अत्यंत महत्त्वाचे पात्र आहे. बी. आर. चोप्रांच्या ‘महाभारत’मध्ये ही भूमिका रूपा गांगुली यांनी साकारली होती. मात्र, काही अहवालांनुसार सुरुवातीला ही भूमिका बॉलिवूड अभिनेत्री जुही चावलांना ऑफर करण्यात आली होती. पण त्यांनी ती नाकारली. परिणामी ही भूमिका रूपा गांगुली यांच्याकडे आली आणि त्यातूनच त्यांना देशभरात प्रचंड लोकप्रियता मिळाली.

बी. आर. चोप्रा अनेकदा म्हणायचे की, जर द्रौपदीचे चीरहरण झाले नसते, तर महाभारत घडलंच नसतं. कारण महाभारतात ही घटना घडली होती. त्यामुळे 'महाभारत' पडद्यावर दाखवणे आवश्यक होते आणि त्याहूनही महत्त्वाचे म्हणजे त्या वेदना प्रेक्षकांपर्यंत पोहोचवणे. हे रूपा गांगुली यांनी अत्यंत प्रभावीपणे केले.

'महाभारत'मधील द्रौपदीच्या चीरहरण सीनआधी बी. आर. चोप्रांनी रूपा गांगुली यांना बोलावून समजावले होते की, एखाद्या स्त्रीला भरसभेत केस पकडून ओढत आणले गेले आणि तिचे वस्त्रहरण करण्याचा प्रयत्न झाला, तर तिची मानसिक अवस्था कशी असेल.

बी.आर. चोप्रा यांनी रूपा गांगुली यांना स्वतःला या दृश्यासाठी मानसिकरीत्या तयार करण्यास सांगितले. शूटिंग सुरू होताच त्यांनी हे दृश्य अत्यंत ताकदीने साकारले. मात्र हे दृश्य इतके वेदनादायक होते की अभिनय करतानाच रूपा गांगुली स्वतःही रडू लागल्या.

‘महाभारत’मधील द्रौपदीच्या चीरहरणाच्या शूटिंगदरम्यान संपूर्ण सेटवर अतिशय भावनिक वातावरण निर्माण झाले होते. हे दृश्य करताना रूपा गांगुली स्वतःला सावरू शकल्या नाहीत आणि सेटवरच ढसाढसा रडल्या. विशेष म्हणजे बी. आर. चोप्रांनी हे संपूर्ण दृश्य फक्त एकाच टेकमध्ये चित्रित केले. या दृश्याबाबत रूपा गांगुली आधीपासूनच खूप घाबरलेल्या होत्या. शूटिंग संपल्यानंतर भावनांनी भारावून जाऊन त्यांनी आपल्या खोलीत जाऊन स्वतःला बंद करून घेतले होते. हे दृश्य केवळ प्रेक्षकांसाठीच नव्हे, तर कलाकारांसाठीही अत्यंत गहन आणि कायम लक्षात राहणारे ठरले. या दृश्याच्या शूटिंगसाठी निर्मात्यांनी 250 मीटर लांबीची साडी वापरली होती.