छत्रपती शिवाजी महाराजांबद्दल 4 प्रश्न, महेश मांजरेकरांनी दिली उत्तरं, तुम्हालाही पटतायत का?

शार्पनर वर्ल्डने महेश मांजरेकर यांना छत्रपती शिवाजी महाराज यांच्याबद्दल काही प्रश्न विचारले. आज छत्रपती शिवाजी महाराज कुठे असतील? या प्रश्नाचं उत्तर देत महेश मांजरेकर म्हणाले,"कुठे असतील माहिती नाही. पण ते जिथे असतील ना त्या जागेला स्वर्ग म्हणत असतील. जिथे महाराज तिथे स्वर्ग".

किल्ला म्हणजे नक्की काय? या प्रश्नाचं उत्तर देत महेश मांजरेकर म्हणाले,"बाप. जिथे आपल्याला सुरक्षित वाटतं आणि जो आपल्यामागे भक्कमपणे उभा राहतो.

महाराज जर शिक्षक असते तर त्यांनी पहिला धडा कोणता शिकवला असता? कर्तव्य आणि माणूस म्हणून उभं राहण्याचं महत्त्व, असं उत्तर महेश मांजरेकर यांनी यावेळी दिलं.

महाराज सगळ्यात जास्त कधी चिडले असतील? या प्रश्नाचं उत्तर देत 'पुन्हा शिवाजीराजे भोसले' या चित्रपटाचे दिग्दर्शक महेश मांजरेकर म्हणाले,"आज. जेव्हा ते आपल्या देशातील शेतकऱ्यांची परिस्थिती बघतील तेव्हा. पण याच परिस्थितीवर मात करण्यासाठी राजे परत येतायत. 'पुन्हा शिवाजीराजे भोसले' याचसाठी केला होता अट्टाहास".

'पुन्हा शिवाजीराजे भोसले' हा बहुचर्चित चित्रपट 31 ऑक्टोबर 2025 रोजी जगभरातील सिनेमागृहांमध्ये प्रदर्शित झाला आहे. ओपनिंग डेला या चित्रपटाने फक्त 19 लाख रुपयांची कमाई केली आहे. आता वीकेंडला हा चित्रपट आणखी कमाई करेल अशी शक्यता वर्तवली जात आहे.

महेश मांजरेकर दिग्दर्शित 'पुन्हा शिवाजीराजे भोसले' या चित्रपटात सिद्धार्थ बोडके, त्रिशा ठोसर, भार्वव जगताप, मंगेश देसाई, विक्रम गायकवाड, शशांक शेंडे, सिद्धार्थ जाधव हे कलाकार महत्त्वाच्या भूमिकेत आहेत.

महेश मांजरेकर अनेकदा सामाजिक प्रश्नांवर परखडपणे मतं मांडताना दिसून येतात. 'पुन्हा शिवाजीराजे भोसले' या चित्रपटाच्या माध्यमातून त्यांनी शेतकऱ्यांच्या आत्महत्येचा प्रश्न मांडला आहे.