Cancer : केवळ गाठ म्हणजे कॅन्सर नाही, स्तनांच्या 'या' 7 बदलांकडे दुर्लक्ष करणे पडू शकते महागात; वेळीच व्हा सावध

महिलांमध्ये हल्ली ब्रेस्ट कॅन्सर हा एक गंभीर विषय आहे. सहसा स्त्रिया स्वतःची तपासणी करताना केवळ गाठ आहे का, हेच पाहतात. पण तुम्हाला माहीत आहे का? अनेकदा गाठ नसतानाही कॅन्सरची सुरुवात झालेली असू शकते. स्तनांच्या आकारात, त्वचेत किंवा बोंडामध्ये होणारे सूक्ष्म बदल हे देखील कर्करोगाचे प्राथमिक संकेत असू शकतात.

आजच्या या विशेष लेखात आपण अशा 7 बदलांविषयी जाणून घेणार आहोत, ज्यांना सामान्य समजून दुर्लक्ष करणे जीवावर बेतू शकते.

1. स्तनांच्या त्वचेचा पोत बदलणेजर स्तनांची त्वचा अचानक जाड झाली असेल किंवा तिचा पोत संत्र्याच्या सालीसारखा खडबडीत वाटू लागला असेल, तर हे चिंतेचे लक्षण असू शकते. याला वैद्यकीय भाषेत 'Peau d'orange' म्हणतात. कर्करोगाच्या पेशींमुळे लसिका वाहिन्यांमध्ये अडथळा निर्माण झाल्यावर असे बदल दिसतात.

2. स्तनांच्या आकारात किंवा रचनेत बदलएका स्तनापेक्षा दुसरा स्तन अचानक मोठा वाटणे किंवा स्तनांचा नैसर्गिक आकार बदलणे (उदा. एक बाजू दबल्यासारखी वाटणे) याकडे लक्ष देणे गरजेचे आहे. मासिक पाळीच्या काळात थोडे बदल होणे सामान्य असले, तरी कायमस्वरूपी राहणारे बदल तपासणे आवश्यक आहे.

3. बोंडांमधून (Nipple) स्त्राव होणेस्तनपान करत नसतानाही जर बोंडांमधून पाणी, पिवळसर द्रव किंवा रक्तासारखा स्त्राव होत असेल, तर हे गंभीर लक्षण असू शकते. हा स्त्राव आपोआप होत असेल किंवा दाबल्यावर येत असेल, तरीही डॉक्टरांचा सल्ला घेणे अनिवार्य आहे.

4. बोंडांचे आत ओढले जाणे (Inverted Nipple)तुमच्या स्तनांचे बोंड आधी बाहेरच्या बाजूला होते आणि आता ते अचानक आतल्या बाजूला ओढले गेले असेल , तर हे कर्करोगाच्या गाठीमुळे असू शकते. गाठ आतून पेशींना ओढत असल्याने असे घडते.

5. सततची खाज किंवा लालसरपणास्तनांवर रॅश येणे, त्वचा लाल होणे किंवा तिथे सतत खाज सुटणे याला अनेकदा आपण साधे इन्फेक्शन किंवा 'एक्झिमा' समजतो. मात्र, 'इन्फ्लेमेटरी ब्रेस्ट कॅन्सर'मध्ये (IBC) गाठ न येता केवळ त्वचा लाल होणे आणि सूज येणे अशी लक्षणे दिसतात.

6. काखेमध्ये सूज किंवा गाठ जाणवणेअनेकदा स्तनांमध्ये काहीच बदल दिसत नाहीत, पण काखेमध्ये (Underarm) एखादी गाठ किंवा सूज जाणवते. आपल्या शरीरातील 'लिम्फ नोड्स'मध्ये कॅन्सर पसरल्यास अशा गाठी येतात. त्यामुळे स्तनांसोबतच काखेचीही तपासणी करणे महत्त्वाचे आहे.

7. न थांबणाऱ्या वेदनास्तन कर्करोगात सहसा वेदना होत नाहीत, हे खरे असले तरी, जर स्तनांच्या एकाच ठराविक भागात सतत वेदना होत असतील आणि त्या मासिक पाळीनंतरही थांबत नसतील, तर त्याचे निदान करणे गरजेचे आहे.

तज्ज्ञांचा सल्ला: काय करावे?स्व-तपासणी : दर महिन्याला आरशासमोर उभे राहून स्तनांची स्वतः तपासणी करा.मॅमोग्राफी : वयाच्या 40 वर्षांनंतर महिलांनी डॉक्टरांच्या सल्ल्याने दरवर्षी किंवा दोन वर्षांनी मॅमोग्राफी स्क्रीनिंग करणे हिताचे असते.घाबरू नका, पण सावध राहा: स्तनांमधील 80% बदल हे कर्करोगाचे नसतात (उदा. साध्या सिस्ट किंवा फायब्रॉइड्स), पण ते नेमके काय आहेत हे केवळ डॉक्टरच ठरवू शकतात.

तुमचे शरीर तुम्हाला बदलांच्या माध्यमातून संकेत देत असते. मला काहीच त्रास होत नाहीय या भ्रमात न राहता, वर नमूद केलेल्या 7 बदलांपैकी काहीही जाणवल्यास त्वरित तज्ज्ञ डॉक्टरांना भेटा. वेळेवर निदान हेच कर्करोगावर मात करण्याचे सर्वात प्रभावी शस्त्र आहे.

(नोट : वरील माहिती सामान्य माहितीवर आधारीत आहे, न्यूज 18 मराठी याची पुष्टी करत नाही, आमचा उद्देश तुमच्यापर्यंत माहिती पोहोचवण्याचा आहे)