'डाएटिंग'ची गरज नाही! फक्त 'या' 5 सवयी लावा; झटक्यात कमी होईल वजन आणि रहाल निरोगी

वजन कमी करण्याची इच्छा बहुतेक लोकांना असते, पण त्यासाठी योग्य मार्ग कोणता हे त्यांना माहिती नसते. सामान्यतः लोकांचा असा समज असतो की, वजन कमी करण्यासाठी व्यायाम करणे आणि खाण्यापिण्यातून काही गोष्टी टाळणे आवश्यक आहे. यासाठी अनेक लोक जिम, डान्स क्लास किंवा योगा क्लास लावतात. त्याच वेळी ते खाण्यापिणे टाळायला लागतात, ज्याला 'डाएटिंग' म्हणतात.

अनेक लोकांना डाएटिंग न करता वजन कमी करायचे असते. काही लोकांना वजन कमी करायचे असते, पण खाण्याचे पदार्थ पाहिल्यावर त्यांचे जिभेवरचे नियंत्रण सुटते. मात्र, 'डाएटिंग' म्हणजे खाणेपिणे सोडून देणे नाही, तर जीवनशैलीत योग्य प्रकारे पौष्टिक आहाराचा समावेश करणे होय. जर तुम्हाला निरोगी पद्धतीने वजन कमी करायचे असेल, तर येथे दिलेल्या 'डाएटिंग' न करता वजन कमी करण्याच्या 5 सोप्या टिप्स नक्की फॉलो करा.

1) हळू-हळू जेवण खा : जेवणाच्या वेळा टाळू नका, पण जेवण योग्य प्रकारे खा. प्रत्येक घास नीट चावून खा. खूप वेगाने खाण्याऐवजी हळू-हळू आणि पूर्ण घास चावून खा. असे केल्याने तुम्ही कमी खाऊनही तुमचे पोट भरेल. टीव्ही, फोन किंवा लॅपटॉप पाहताना खाणे टाळा आणि फक्त खाण्यावर लक्ष केंद्रित करा.

2) पुरेसे पाणी प्या : योग्य प्रमाणात पाणी पिणे वजन कमी करण्यासाठी खूप फायदेशीर आहे. दररोज 8 ते 10 ग्लास पाणी प्या. जेवण करण्याच्या 30 मिनिटांपूर्वी एक ग्लास पाणी प्यायल्यास लवकर पोट भरते आणि तुम्ही कमी खाता. याशिवाय, कधीकधी शरीराला भूक आणि तहान यातला फरक कळत नाही. जेव्हा तुम्हाला भूक लागल्यासारखे वाटेल, तेव्हा आधी पाणी पिऊन बघा.

3) पुरेशी झोप घ्या : झोप कमी झाल्यास वजन वाढते. कमी झोपेमुळे भूक वाढवणारे हार्मोन्स वाढतात, ज्यामुळे जास्त खाण्याची इच्छा होते. अशा परिस्थितीत निरोगी राहण्यासाठी दररोज 7 ते 8 तास झोप घेणे आवश्यक आहे.

4) सक्रिय राहा : तुम्ही जिममध्ये जात नसाल किंवा जड व्यायाम करत नसाल तरीही, दिवसभर छोट्या-छोट्या कामांमध्ये सक्रिय राहा. लिफ्टऐवजी जिन्याचा वापर करा, छोटी अंतरे पायी चालत जा आणि दर तासाला थोडावेळ फिरा. यामुळे शरीर सक्रिय राहते आणि कॅलरी बर्न होण्यास मदत होते. जर तुम्हाला व्यायाम करायचा नसेल, तर केर काढणे, फरशी पुसणे आणि बागकाम करणे यांसारख्या घरगुती कामांनीही चांगल्या कॅलरीज बर्न होतात. दररोज पायी चालण्याची सवय लावा आणि काही मिनिटे वेगाने चाला.

5) पौष्टिक आहारावर लक्ष केंद्रित करा : जर तुम्ही तुमच्या खाण्यावर नियंत्रण ठेवू शकत नसाल, तर तुम्ही तुमच्या आहारात नक्कीच पौष्टिक पदार्थांचा समावेश करू शकता. जास्त प्रमाणात फायबर आणि प्रोटीनचे सेवन करा. तुमच्या आहारात फळे, भाज्या, मोड आलेली कडधान्ये आणि सुका मेवा यांचा समावेश करा. यामुळे बद्धकोष्ठता (constipation) दूर होते. पोट भरलेले राहते आणि तुम्हाला वारंवार भूक लागत नाही. जर तुम्ही जंक फूड खाणे टाळू शकत नसाल, तर त्याचे पर्याय शोधा, जसे साखरेऐवजी गूळ वापरून बनवलेले पदार्थ खा. बाहेरच्या खाण्याऐवजी घरचे बनवलेले अन्न खा.