मायग्रेनची समस्या सुरू झाल्यावर काय करावं आणि काय करू नये? जाणून घ्या महत्त्वाची माहिती

डोकेदुखी ही एक सामान्य समस्या आहे आणि अनेकजण यामुळे त्रस्त असतात. डोकेदुखीमध्ये अनेकांना मायग्रेनचा त्रास होतो. मायग्रेन समजून घेऊन आणि त्यावर योग्य ती पावलं उचलून तुम्ही तो नियंत्रणात ठेवू शकता. मायग्रेन सुरू झाल्यावर काय करावं आणि काय करू नये याची माहिती या ठिकाणी दिली आहे.

1) काही लोकांना मायग्रेन सुरू होण्यापूर्वी सिग्नल मिळू लागतात, त्यांना 'प्रोड्रोम' म्हणतात. मायग्रेन सुरू होण्याच्या काही तास किंवा दोन दिवस आधी हे सिग्नल दिसू शकतात. मायग्रेनने ग्रस्त असलेल्या 60 टक्के लोकांना प्रोड्रोमची जाणीव होते. या लक्षणांमध्ये बद्धकोष्ठता किंवा अतिसार, मनःस्थिती बदलणं, मान आखडणं आणि काही खाद्यपदार्थ किंवा पेयांच्या सेवनाची इच्छा होणं, यांचा त्यात समावेश असू शकतो.

2) मायग्रेन झटका येण्याआधी किंवा दरम्यान काही लोकांना ऑराचा सामना देखील करावा लागू शकतो. मायग्रेन असणाऱ्या सुमारे 20 टक्के लोकांना ऑरा अनुभव येतो. ऑराच्या लक्षणांमध्ये दृष्टी नाहीशी होणं, चमकणारा प्रकाश किंवा स्पॉट्स दिसणं, आवाज किंवा संगीत ऐकू येणं, हात किंवा पायांमध्ये सुया टोचल्यासारखं वाटणं, यांचा समावेश होतो.

3) मायग्रेन असल्यास कॅफिनचं सेवन केलं पाहिजे. कॉफी, चहा किंवा कोला प्यायल्याने काही लोकांची डोकेदुखी कमी होऊ शकते. पण, पदार्थ जास्त प्रमाणात पिऊ नयेत. विशेषत: झोपण्यापूर्वी कॅफिनचं सेवन करू नका.

4) मायग्रेनमुळे होणारी डोकेदुखी कमी करण्यासाठी हीटिंग पॅड किंवा आईस पॅकचा वापर करता येतो. डोक्यावर किंवा मानेवर बर्फ किंवा हीटिंग पॅड लावल्याने वेदना कमी होऊ शकतात आणि आराम मिळू शकतो.

5) मायग्रेनची समस्या असल्यास पुरेशा प्रमाणात पाणी पिणं फार गरजेचं आहे. पाण्याची बाटली नेहमी सोबत ठेवावी आणि वेळोवेळी पाणी प्यावं.

6) डोकेदुखी कमी करण्यासाठी तुम्ही वारंवार औषधं किंवा गोळ्या घेता मात्र, यामुळे तुमच्या शरीरावर अनेक दुष्परिणाम होऊ शकतात. महिन्यातून 10 दिवसांपेक्षा जास्त काळ वेदनाशामक औषध घेऊ नका. यामुळे 'रीबाउंड' डोकेदुखी होऊ शकते.

7) मायग्रेनला चालना देणारे पदार्थ खाऊ नयेत. जुनं झालेलं चीज, अल्कोहोल, प्रक्रिया केलेले मांस, चॉकलेट किंवा कृत्रिम गोड पदार्थ मायग्रेनला ट्रिगर करू शकतात. असे पदार्थ टाळले पाहिजेत.