3 स्टेपलर आणि 5 मिनिटात बाप्पासाठी सुंदर मखर तयार; संदेश गावकरची अफलातून आयडिया!

गणपती बाप्पाच्या आगमनाचे वेध आता सर्वांनाच लागले आहेत. बाप्पाच्या स्वागतासाठी मार्केट सजल आहे. त्याचबरोबर घरोघरी देखील त्याची तयारी सुरू झालीय. आपला बाप्पा हा जास्तीत जास्त चांगला दिसावा यासाठी त्याच्याभोवती सजावट केली जाते.

गेली अनेक वर्ष थर्माकोलनं मखर बनवली जात असे. पण, पर्यावरणावर होणाऱ्या त्याच्या परिणामामुळे थर्माकोलच्या वापरावर बंदी आली आहे. त्यावर ठाणे जिल्ह्यातल्या कळव्यातल्या तरुणानं डोकं लढवत नवा उपाय शोधला आहे.

कळव्यातला संदेश गावकर हा तरुण गेली सहा वर्ष नोकरी सांभाळून मखर बनवण्याचा व्यवसाय करत आहे. उत्सव साजरे करताना पर्यावरणाचं भान जपण्याबाबत आता चांगलीच जागृती झालीय. त्यामुळे या ग्राहकांसाठी त्यानं चक्क इरकलीच्या साडीपासून मखर बनवलेत. इरकल सर्कल आणि पैठणी पंखा या स्वरुपात त्यानं मखर बनवलीय.

संदेशनं यापूर्वी ऐतिहासिक काळात निरोप पोहचवण्यासाठी वापरले जाणारे लखोट्या वेगवेगळ्या आकाराचे मखर बनवले होते. टीव्हीवरील छत्रपती संभाजी महाराज या मालिकेतील इरकल साडी आम्हाला आकर्षक वाटली. त्यामुळे आम्ही 2018 साली सर्वप्रथम इरकल साडीपासून लखोटे बनवण्यास सुरूवात केली. ग्राहकांनी त्याला मोठा प्रतिसाद दिला.

या प्रतिसादानंतर त्यानं गेल्या वर्षी पैठणी पंखा ही कलाकृती तयार केली. यावर्षा आम्ही बाप्पाची आरास करण्यासाठी वापरल्या जााणाऱ्या गंगा जमुना या कापडापासून कलाकृती तयार केलीय. या कलाकृतीलाही ग्राहकांकडून चांगला प्रतिसाद मिळतोय, असं संदेशनं सांगितलं.

आम्ही सुरूवातीपासूनच कमी वेळामध्ये फोल्डिंग मखर तयार करण्याच्या कल्पनेवर भर दिलाय. तीन स्टेपलर मारून अवघ्या पाच मिनिटात हा संपूर्ण मखर उभा राहतो.

यामध्ये साडीनं तयार केलेला पंखा, लोखंडी स्टँड, दोन लोड, एक आसन कपडा, एक छत्री असे साहित्य एका छोट्याश्या बॉक्समध्ये पॅक करुन हा मखर तुम्हाला कुठेही नेऊ शकतो. याची किंमत 4100 रुपये असून ऑस्ट्रेलिया, न्यूझीलंड, अमेरिका, ब्रिटन, यूएईसह 100 पेक्षा जास्त देशांमध्ये यावर्षी मखर पाठवण्यात आले आहेत, अशी माहिती संदेशनं दिली.