विदर्भात 2 दिवस धो धो सुरूच राहणार, काय आहे हवामान विभागाचा अलर्ट?

राज्यातील विविध भागात पुन्हा जोरदार हजेरी लावलीये. विदर्भात गेल्या काही दिवसांपासून पावसाचा जोर कायम आहे. पुढील 2 दिवस धो धो पाऊस सुरूच राहणार असल्याचा अंदाज हवामान विभागाने वर्तवलाये.

विदर्भातील भंडारा, नागपूर, यवतमाळ, वर्धा येथे तुरळक ठिकाणी जोरदार पावसाची शक्यता आहे. काही भागात विजांच्या कडकडाटासह मुसळधार पावसाची शक्यता असल्याने हवामान विभागाने पुढील दोन दिवस यलो अलर्ट दिला आहे.

भंडारा जिल्ह्यात सोमवारी रात्रीपासून मुसळधार पाऊस झाल्याने नदी नाले ओसांडून वाहत आहे. त्यामुळे आज शाळा व महाविद्यालय बंद ठेवण्याचे आदेश देण्यात आले आहेत.

गडचिरोलीमध्ये गेल्या दोन दिवसांत झालेल्या पावसामुळे पर्लकोटा नदीच्या पुलावर पाणी आले आहे. त्यामुळे जिल्हा मुख्यालयासोबत संपर्क तुटला असून तेथील जनजीवन विस्कळीत झाले आहे.

विदर्भासह मध्य महाराष्ट्र, मराठवाड्यातही मुसळधार ते अती मुसळधार पावसाची शक्यता हवामान विभागाकडून वर्तवण्यात आली आहे. त्यामुळे नागरिकांना योग्य ती काळजी घ्यावी लागणार आहे.