Nanded Accident : नांदेडमध्ये ट्रॅक्टरच्या ट्रॉलीने घेतला कुटुंबाचा बळी; पती-पत्नीसह 5 वर्षीय बालक जागीच ठार! घटनेचे PHOTOS

मुक्रमाबाद-नांदेड-बिदर राष्ट्रीय महामार्गावर बिहारीपूरजवळ उभ्या असलेल्या ट्रॅक्टर ट्रॉलीवर मोटारसायकल आदळून झालेल्या भीषण अपघातात पती-पत्नी व पाच वर्षीय चिमुकला ठार झाला. ही दुर्दैवी घटना 23 मे रोजी दुपारी 3 वाजेच्या सुमारास घडली.

परतपूर फाटा येथील मोहसीन गणीसाब शेख (वय 30), पत्नी फरिदा मोसीन शेख (वय 28), जुनेद मोसिन शेख (वय 5) हे तिघेजण मुखेडकडून मुक्रमाबादकडे येत होते.

यावेळी बिहारीपूर येथील राष्ट्रीय महामार्गावर उभ्या असलेल्या ट्रॉलीवर मोटारसायकल आदळून तिघेही ठार झाले. तिघांना मुक्रमाबाद येथे रुग्णालयात घेऊन जात असताना मोहसीन गणीसाब शेख व फरीदा मोहसीन शेख या जोडप्याचा मृत्यू झाला.

तर, उपचारासाठी उदगीर येथे घेऊन जाताना जखमी बालक जुनेद शेख याचा वाटेतच मृत्यू झाला.

आरोग्य केंद्र मुक्रमाबाद येथे तिघांचे मृतदेह शवविच्छेदनासाठी आणले. पोलिसात गुन्हा दाखल करण्याची प्रक्रिया चालू आहे.