Samruddhi Mahamarg: सिन्नरला समृद्धी महामार्गावर भीषण अपघात, Kia कारचा भुगा; दोघांचा मृत्यू

सिन्नरला समृद्धी महामार्गावर भीषण अपघात घडला आहे. टायर फुटल्यामुळे किया करेन्स ही गाडी महामार्गावर उलटून ट्रकला धडकली. या अपघातात दोन जणांचा मृत्यू झाला असून नऊ जण जखमीं आहेत

या अपघातात तीन प्रौढ आणि आठ लहान मुले असे एकूण 11 जण या गाडीतून प्रवास करत होते. प्रौढांमधील एक पुरुष तर एक महिला यामध्ये दगावले आहेत.

सिन्नर तालुक्यातील फर्दापूर येथे विवाह सोहळ्यानिमित्त आलेल्या कल्याण येथील नातेवाईकांवर ही दुर्दैवी वेळ ओढवली आहे. सिन्नर तालुक्यातील पाटोळे शिवारात येणाऱ्या समृद्धी महामार्गावर हा भीषण अपघात घडला.

या अपघातात गाडीचा पूर्ण भुगा झाला असून जखमींवर सिन्नरच्या खाजगी रुग्णालयात उपचार सुरू आहे. तिघांना उपचारासाठी नाशिक येथे हलवले आहे.

दोन खाजगी बस आणि एक चार चाकीचे नुकसान झाले आहे. बालकांचा समावेश असलेल्याच गाडीला अपघात झाल्याने कुटुंबावर दु:खाचा डोंगर कोसळला आहे.

एक वाजता अपघात झाल्यानंतर समृद्धी महामार्गावरील खाजगी बस चार वाजेपर्यंत देखील जखमी पर्यंत पोहोचल्या नाहीत.

घटनेचा अधिक तपास सिन्नर पोलीस करत आहेत. डोक्याला इजा झालेल्या बालकांवर सिन्नर मध्ये उपचार सुरू आहेत