Gold Investment: सोनं एवढं महाग तरी तुमच्या बजेटमध्ये कसं घ्यायचं? टेन्शन नाही वापरा ही ट्रिक

आजकाल सोनं खूप महाग होत चाललं आहे. सोनं घेणं परवडणार नाही असं म्हटलं जात आहे. पण तुमच्या बजेटमध्ये अजूनही सोनं घेण्याची संधी आहे असं आम्ही तुम्हाला सांगितलं तर? विश्वास बसणार नाही, म्हणाल मस्करी करते, पण खरंच तुम्ही तुमच्या बजेटमध्ये सोनं घेऊ शकता. अगदी 1000 रुपयांपासून तुम्ही सोन्यात गुंतवणूक करू शकता तेही अगदी सुरक्षितरित्या. ना ज्वेलर्सकडे पैसे देण्याची भीती ना तो पळून जाण्याची भीती.

भारतात सोनं खरेदी करणं ही फक्त परंपरा नाही, तर तो एक भावनिक आणि गुंतवणुकीचा विषय आहे. आतापर्यंत आपण सोनारच्या दुकानात जाऊन दागिने किंवा नाणी खरेदी करायचो. पण आता जमाना बदलला आहे. कपाटात सोनं ठेवण्यापेक्षा ते मोबाईलमध्ये सुरक्षित ठेवून त्यातून कमाई करण्याचा एक स्मार्ट मार्ग सध्या लोकप्रिय होतोय, तो म्हणजे गोल्ड ETF प्रकार. सर्वात महत्त्वाचं म्हणजे, सोनं महाग असलं तरी आता तुम्ही तुमच्या खिशाला परवडेल इतक्या छोट्या रकमेतूनही सोन्यात गुंतवणूक करू शकता.

गोल्ड ETF म्हणजे नेमकं काय? सोप्या भाषेत सांगायचं तर, गोल्ड ETF हा सोन्याच्या भावावर चालणारा एक प्रकारचा 'म्युच्युअल फंड' आहे. यात तुम्ही प्रत्यक्ष सोन्याचं बिस्किट किंवा दागिना घरी आणत नाही, तर सोन्यात 'इलेक्ट्रॉनिक' पद्धतीने गुंतवणूक करता. शेअर बाजारात जसे शेअर्स खरेदी-विक्री केले जातात, अगदी तसेच तुम्ही सोन्याचे युनिट्स खरेदी करू शकता. जेव्हा तुम्ही हे युनिट्स विकता, तेव्हा सोन्याच्या त्यावेळच्या बाजारभावानुसार पैसे तुमच्या बँक खात्यात जमा होतात.

आजकाल १०-१५ हजार रुपयांमध्ये पण सोनं येईना अशी परिस्थिती आहे. गोल्ड ETF मध्ये तुम्ही अगदी १ ग्रॅम सोन्याच्या किमतीतही त्याहून कमी गुंतवणूक सुरू करू शकता. तुमच्याकडे जसे पैसे येतील, तसे तुम्ही एक-एक युनिट खरेदी करू शकता. अगदी एसआयपी (SIP) द्वारेही यात गुंतवणूक शक्य आहे.

चोरीची भीती नाही, लॉकरचं टेन्शन नाही घरचं सोनं सांभाळणं ही मोठी डोकेदुखी असते. चोरी होईल की काय? ही भीती सतत असते. गोल्ड ETF तुमच्या 'डीमॅट अकाउंट'मध्ये डिजिटल स्वरूपात असतं. त्यामुळे ते हरवण्याची किंवा चोरीला जाण्याची शक्यता शून्य असते.

'मेकिंग चार्ज'चा भुर्दंड वाचतो जेव्हा आपण दागिने घेतो, तेव्हा सोनार १० ते २० टक्के 'मेकिंग चार्ज' लावतात. सोनं विकायला गेल्यावर हे पैसे कापले जातात. गोल्ड ETF मध्ये कोणताही मेकिंग चार्ज नसतो. फक्त १ टक्क्यापेक्षा कमी ब्रोकरेज द्यावं लागतं, जे दागिन्यांच्या खर्चाच्या तुलनेत खूपच नगण्य आहे.

शुद्धतेची १००% खात्री सोनं खरेदी करताना ते खरं आहे का? त्यात भेसळ तर नाही ना? असे अनेक प्रश्न मनात असतात. गोल्ड ETF मधील सोनं हे ९९.५% शुद्धतेचं असतं. याची खात्री थेट शेअर बाजार आणि संबंधित संस्था देत असल्याने शुद्धतेची काळजी करण्याची गरज नसते.

पैशांची नड भासल्यास त्वरित विक्री अडल्या-नडल्या वेळी दागिने विकायला नेल्यावर सोनार अनेकदा कमी भाव लावतात. पण गोल्ड ETF तुम्ही कधीही, एका क्लिकवर बाजारभावाने विकू शकता आणि पैसे थेट तुमच्या खात्यात येतात. तसेच, गरज पडल्यास यावर कर्ज देखील घेता येते.

गोल्ड ETF मध्ये गुंतवणूक करण्यासाठी तुमच्याकडे डीमॅट अकाउंट असणं गरजेचं आहे. एकदा का हे अकाउंट उघडलं की, तुम्ही शेअर बाजारातून सोन्याचे युनिट्स कधीही खरेदी किंवा विक्री करू शकता.