Women Success Story: शिक्षणानंतर परदेशात जाण्याचं स्वप्न अपूरं राहिलं, मुग्धाने सुरू केला केक व्यवसाय, महिन्याला इतकी कमाई

अनेक महिला सध्याच्या घडीला व्यवसाय करत आहेत. काही वर्षांपूर्वी मुग्धा जाधव हिने लालबाग परळमध्ये छोट्याशा स्टॉलवरून केक विक्रीला सुरुवात केली होती. ना मोठा अनुभव, ना मोठी गुंतवणूक फक्त चव आणि जिद्दीचा आधार.

तिने बनवलेले केक्स आणि डेसर्ट्स इतके खास होते की ग्राहकांची पसंती मिळाली. हळूहळू तिच्या हातची चव ओळखली जाऊ लागली आणि त्याचाच परिणाम म्हणजे ग्राहकांची संख्या दिवसेंदिवस वाढू लागली.

हॉटेल मॅनेजमेंटमध्ये शिक्षण घेतल्यानंतर इंटर्नशिप दरम्यान बेकरीमध्ये ‘स्टार इंटर्न’चा किताब मिळवणाऱ्या मुग्धाने पुढे करिअरसाठी परदेशात जाण्याचं स्वप्न पाहिलं होतं. मात्र त्याचवेळी कोरोनामुळे लॉकडाऊन लागला आणि तिचं ते स्वप्न अपूरं राहिलं. पण तिने परिस्थितीसमोर हार मानली नाही.

घरच्या घरी युरोपियन डेझर्ट्स बनवायला सुरुवात केली. सुरुवातीला केवळ घरच्यांसाठी बनवलेले डेझर्ट्स लवकरच मित्रपरिवार आणि सोसायटीत पोहोचले आणि सर्वत्र तिच्या चवीला दाद मिळाली.

या प्रवासातला खरा टर्निंग पॉईंट ठरला गणेशोत्सव. लालबाग गणेशगल्ली येथे तिने 10 दिवसांचा स्टॉल लावला आणि तिच्या केक्सना आणि डेसर्ट्सला अफाट प्रतिसाद मिळाला. इथूनच तिची ओळख निर्माण झाली आणि अनेक ग्राहक कायमचे जोडले गेले. त्याच आधारावर तिने दर शनिवार-रविवारी स्टॉल लावायला सुरुवात केली आणि अखेर परळ व्हिलेजमध्ये शी फॉर केक या नावाने स्वतःचं शॉप सुरू केलं. यामधून महिन्याला ती 70 हजारांची कमाई करत आहे.

आज तिचं शॉप यशस्वीपणे चालू असलं तरी ती आपली सुरुवात विसरलेली नाही. म्हणूनच दरवर्षीप्रमाणे यंदाही 2025 मध्ये सलग तिसऱ्या वर्षी मुग्धा लालबाग गणेशगल्लीत शी फॉर केक चा स्टॉल लावणार आहे.

मुग्धा अभिमानाने सांगते, आज मी जिथे आहे, ते माझ्या ग्राहकांमुळे आणि कुटुंबाच्या पाठिंब्यामुळेच शक्य झालं आहे. ती इतर महिलांनाही संदेश देते की, प्रयत्न केलेच पाहिजेत. पुढे काय होईल ते नंतर पाहू, पण ट्राय नक्की केला पाहिजे. या गणेशोत्सवात जर तुम्ही लालबागला जात असाल, तर शी फॉर केकचा स्टॉलला नक्कीच भेट द्या आणि तिच्या चविष्ट डेसर्ट्सचा अनुभव घ्या.