Weather Alert: थंडीचं तुफान येतंय! पुणे-मुंबईसह या भागात पारा घसरला, हवामान विभागाचा अलर्ट

राज्यात गेल्या काही दिवसांपासून तापमानात चढ-उतार होत असले तरी वातावरण थंडीला पोषक बनले आहे. उत्तर दिशेने येणाऱ्या थंड वाऱ्यांमुळे पहाटे आणि रात्री गारवा अधिक तीव्र जाणवत असून अनेक भागांत धुके आणि हुडहुडीची स्थिती आहे. किमान तापमानात घट होत असल्याने हिवाळ्याचा प्रभाव स्पष्टपणे वाढताना दिसत आहे. अशातच 25 डिसेंबर 2025 रोजी राज्यातील विविध भागांत हवामान कसे राहणार, थंडीचा पारा वाढणार की स्थिर राहणार, हे जाणून घेणे महत्त्वाचे ठरणार आहे. 25 डिसेंबर रोजीचा महाराष्ट्रातील हवामान अंदाज जाणून घेऊ.

मुंबई महानगर क्षेत्रात हवामान कोरडे राहण्याची शक्यता आहे. सकाळच्या वेळी गारठा जाणवेल, मात्र दिवसभर आकाश निरभ्र राहील. मुंबई, ठाणे आणि नवी मुंबईत किमान तापमानात किंचित घट होण्याचा अंदाज आहे. पालघर जिल्ह्यात ग्रामीण भागांत थंडीचा प्रभाव अधिक जाणवू शकतो. समुद्रकिनारी भागात थंडी सौम्य असली तरी पहाटे गारवा राहणार आहे.

पुणे शहर आणि परिसरात थंडीचा कडाका कायम राहणार आहे. पुणे शहरात 25 डिसेंबर रोजी कमाल तापमान सुमारे 30 अंश सेल्सिअस तर किमान तापमान 9 अंश सेल्सिअस इतके राहण्याचा अंदाज आहे. सकाळच्या वेळी धुक्याची शक्यता असून गारठ्यामुळे नागरिकांना उबदार कपड्यांचा आधार घ्यावा लागणार आहे. पुणे जिल्ह्यातील ग्रामीण भाग, विशेषतः मुळशी, भोर आणि हवेली परिसरात किमान तापमान 8 ते 9 अंश सेल्सिअसपर्यंत खाली जाण्याची शक्यता असून येथे थंडी अधिक तीव्र जाणवणार आहे.

उत्तर महाराष्ट्रात थंडीचा कडाका अधिक तीव्र झाल्याचे चित्र आहे. नाशिकमध्ये कमाल तापमान सुमारे 28 अंश सेल्सिअस तर किमान तापमान 10 अंश सेल्सिअस इतके राहण्याची शक्यता आहे. अहिल्यानगर जिल्ह्यात किमान तापमान 9 ते 10 अंश सेल्सिअसपर्यंत घसरले असून जळगावमध्येही तापमान 10 अंशांच्या आसपास नोंदवले जाण्याचा अंदाज आहे. ग्रामीण भागात सकाळच्या वेळी गारठा अधिक जाणवणार आहे.

मराठवाडा आणि विदर्भातही थंडी कायम आहे. छत्रपती संभाजीनगरमध्ये कमाल तापमान सुमारे 29 अंश सेल्सिअस तर किमान तापमान 12 अंश सेल्सिअस इतके राहणार आहे. नागपूरमध्ये कमाल तापमान 28 अंश सेल्सिअस तर किमान तापमान 11 अंश सेल्सिअसपर्यंत खाली येण्याची शक्यता आहे. या भागांत सकाळी गारठा जाणवेल, तर दुपारी सौम्य उन्हाचा अनुभव येईल. त्यामुळे नागरिकांनी योग्य ती काळजी घ्यावी.