0 ते 100 फक्त 4.8 सेकंदात, 230 किमी टॉप स्पीड, पुण्यात 2 जणांना चिरडणाऱ्या श्रीमंत बापाच्या पोराची अशी Porsche

पुणे शहरात शनिवारी, 18 मे रोजी पोर्शे कारने बाइकला दिलेल्या धडकेमुळे दोघांचा मृत्यू झाला. ही आलिशान पोर्शे कार पुण्यातल्या बांधकाम व्यावसायिकाचा अल्पवयीन मुलगा चालवत होता. ही घटना घडल्यानंतर अवघ्या 15 तासांत या मुलाला जामीन मिळाल्याने सर्वत्र संतापाची लाट उसळली आहे.

अपघाताला कारणीभूत ठरलेल्या अल्पवयीन मुलाचे वडील आणि त्याला दारू देणाऱ्या दोन पब चालकांवरदेखील गुन्हा दाखल करण्यात आला आहे. या प्रकरणाच्या पार्श्वभूमीवर पोर्शे ही आलिशान गाडीदेखील चर्चेत आली आहे.

पुण्याच्या कल्याणीनगर परिसरात घडलेल्या या प्रकरणात पोर्शे टायकन या मॉडेलचा समावेश आहे. ही आलिशान गाडी अनेक फीचर्सनी सुसज्ज आहे. पोर्शे टायकनच्या समोरच्या बाजूला मॅट्रिक्स एलईडी हेडलाइट्स आहेत.

स्टँडर्ड हाय-रिझोल्युशन मॅट्रिक्स डिझाइन एलईडी हेडलाइट्स हे स्टँडर्ड टर्बाइनवर माउंट केलेले आहेत. या वाहनात 360 डिग्री कॅमेरा फंक्शनदेखील आहे. या कारमध्ये 10.9-इंच टचस्क्रीन पॅनेल आहे. हे पॅनेल नेव्हिगेशन आणि इन्फॉर्मेशन सिस्टीम म्हणून काम करतं.

टायकन ही एक शक्तिशाली कार आहे. 300 kW किंवा 408 PS इतकी या कारची क्षमता आहे. या कारचा कमाल वेग ताशी 230 किलोमीटर इतका आहे. कारचा अॅक्सलरेशन टाइम 4.8 सेकंद इतका आहे. म्हणजे ही कार 4.8 सेकंदांत शून्यापासून ताशी 100 किलोमीटरचा वेग धारण करू शकते.

पोर्शे टायकनचं इलेक्ट्रिक व्हर्जनदेखील या वर्षी मार्चमध्ये लाँच करण्यात आलं आहे. पोर्शे टायकन टर्बो जीटी ही एक शक्तिशाली आणि वेगवान कार आहे. ही कार 2.1 सेकंदात ताशी 0 ते 100 किलोमीटर वेग धारण करू शकते. या जर्मन ऑटोमेकर कंपनीचा असा दावा आहे, की ही कार ताशी कमाल 305 किलोमीटरपर्यंतचा वेग धारण करू शकते.

या कारची पॉवर आणि फीचर्समुळे तिची किंमत कोटी रुपये आहे. पोर्शे टायकनची एक्स-शोरूम किंमत 1.61 कोटी रुपयांपासून सुरू होते आणि ती 2.44 कोटी रुपयांपर्यंत जाऊ शकते.