Weather Alert : महाराष्ट्रात गुरुवारी वादळी पाऊस कोसळणार, 20 जिल्ह्यांना अलर्ट

राज्यातील वातावरणात सतत बदल जाणवत आहे. गेले काही दिवस राज्यातील विविध भागांत पावसाने उघडीप दिली. तर काही भागांत हलक्या सरी बरसल्याचे दिसून आले. 23 ऑक्टोबर रोजी राज्यातील हवामानात पुन्हा बदल जाणवण्याची शक्यता आहे. राज्यात पावसाचा जोर वाढणार असल्याची माहिती हवामान विभागानं दिली आहे. कोकण, पश्चिम महाराष्ट्र, उत्तर महाराष्ट्र आणि मराठवाड्यातील काही जिल्ह्यांत वादळी पावसाचा इशारा देण्यात आला आहे. पाहुयात 23 ऑक्टोबर रोजी राज्यातील हवामानाची स्थिती कशी राहील.

कोकण विभागातील पालघरमध्ये हलक्या ते मध्यम पावसाचा इशारा देण्यात आला आहे. तर ठाणे, मुंबई, रायगड, रत्नागिरी आणि सिंधुदुर्ग जिल्ह्यांमध्ये वादळी वाऱ्यासह आणि विजांच्या कडकडाटासह हलक्या ते मध्यम स्वरूपाच्या पावसाची शक्यता आहे. ठाणे, मुंबई, रायगड, रत्नागिरी आणि सिंधुदुर्ग जिल्ह्यासाठी यलो अलर्ट जारी करण्यात आला आहे.

पश्चिम महाराष्ट्रातील पुणे, कोल्हापूर, सातारा, सांगली आणि सोलापूर जिल्ह्यांमध्ये वादळी वाऱ्यासह आणि विजांच्या कडकडाटासह हलक्या ते मध्यम स्वरूपाच्या पावसाची शक्यता आहे. पुणे, कोल्हापूर आणि सातारा घाटमाथा परिसरातही पावसाचा इशारा देण्यात आला आहे. पश्चिम महाराष्ट्रातील संपूर्ण जिल्ह्यांत यलो अलर्ट जारी करण्यात आला आहे.

मराठवाड्यातील छत्रपती संभाजीनगर, जालना, परभणी आणि हिंगोली जिल्ह्यांमध्ये हलक्या ते मध्यम स्वरूपाचा पाऊस होऊ शकतो. बीड, नांदेड, लातूर आणि धाराशिवमध्ये विजांचा कडकडाट आणि वादळी वाऱ्यासह पाऊस पडण्याची शक्यता असून या चार जिल्ह्यांना यलो अलर्ट जारी करण्यात आला आहे.

उत्तर महाराष्ट्रातील धुळे, नंदुरबार आणि जळगावमध्ये हलक्या स्वरूपाचा पाऊस पडण्याची शक्यता आहे. तर नाशिक, नाशिक घाटमाथा आणि अहिल्यानगरमध्ये विजांचा कडकडाट आणि वादळी वाऱ्यासह हलक्या ते मध्यम स्वरूपाचा पाऊस पडण्याची शक्यता आहे. या तीन ठिकाणी यलो अलर्ट जारी करण्यात आला आहे.

विदर्भातील अमरावती, भंडारा, चंद्रपूर, गडचिरोली, गोंदिया, नागपूर, वर्धा आणि यवतमाळ जिल्ह्यांमध्ये 23 ऑक्टोबर रोजी कुठलीही पावसाची शक्यता नाही. मात्र अकोला, बुलढाणा आणि वाशिममध्ये वादळी वाऱ्यासह विजांचा कडकडाटासह पावसाची शक्यता असून या जिल्ह्यांत यलो अलर्ट जारी केला आहे.

23 ऑक्टोबर रोजी राज्यातील विविध भागांत पावसाची शक्यता वर्तवण्यात आली आहे. त्यामुळे नागरिकांनी आवश्यक ती काळजी घेणे गरजेचे आहे.