Weather Alert: तुफान आलंया! राज्यात पुन्हा मुसळधार पावसाचे दिवस, 11 जिल्ह्यांना ऑरेंज अलर्ट

राज्यात पुन्हा एकदा पावसाचा जोर वाढताना दिसून येत आहे. 7 जुलै रोजी देखील राज्यातील सर्वच भागांत पावसाची शक्यता हवामान विभागानं वर्तवली आहे.

कोकण, पश्चिम महाराष्ट्र, उत्तर महाराष्ट्र, मराठवाडा आणि विदर्भातील काही जिल्ह्यांतही मुसळधार पावसाची शक्यता आहे. पाहुयात 7 जुलै रोजी राज्यात हवामानाची स्थिती कशी राहील.

मुंबईत काही ठिकाणी मुसळधार पावसाची शक्यता हवामान विभागानं वर्तवली आहे. कोकण विभागातील ठाणे, पालघर, सिंधुदुर्ग जिल्ह्यांत मुसळधार पावसाची शक्यता असल्यानं यलो अलर्ट जारी करण्यात आला आहे. रायगड, रत्नागिरी या दोन जिल्ह्यांत मुसळधार ते अति मुसळधार पावसाची शक्यता असल्याने ऑरेंज अलर्ट जारी करण्यात आला आहे.

पश्चिम महाराष्ट्रातील पुणे घाटमाथा, सातारा घाटमाथा या दोन्ही ठिकाणी मुसळधार पावसाची शक्यता असल्यानं पावसाचा ऑरेंज अलर्ट जारी करण्यात आला आहे. कोल्हापूर घाटमाथा परिसरात देखील मुसळधार पावसाची शक्यता असल्यानं यलो अलर्ट जारी करण्यात आला आहे. पुणे, सोलापूर, कोल्हापूर, सातारा, सांगली या सर्व जिल्ह्यांत हलक्या ते मध्यम स्वरूपाच्या पावसाची शक्यता आहे.

छत्रपती संभाजीनगरमध्ये वादळी वाऱ्यासह आणि विजांच्या कडकडाटासह पावसाची शक्यता आहे. जालना, परभणी, हिंगोली, नांदेड या सर्व जिल्ह्यांत मुसळधार पावसाची शक्यता असल्यानं पावसाचा यलो अलर्ट जारी करण्यात आला आहे. बीड, लातूर, धाराशिव या तीन जिल्ह्यांत हलक्या ते मध्यम स्वरूपाच्या पावसाची शक्यता आहे.

उत्तर महाराष्ट्रातील धुळे, नंदुरबार आणि नाशिक घाटमाथा परिसरात मुसळधार पावसाची शक्यता आहे. जळगाव जिल्ह्यांत विजांच्या कडकडाटासह पावसाची हवामान विभागानं वर्तवली आहे. या सर्व जिल्ह्यांना पावसाचा यलो अलर्ट जारी करण्यात आला आहे. नाशिक आणि अहिल्यानगर जिल्ह्यांत हलक्या ते मध्यम स्वरूपाच्या पावसाची शक्यता आहे.

विदर्भातील अकोला आणि यवतमाळ या दोन्ही जिल्ह्यांत मुसळधार पावसाची शक्यता असल्यानं पावसाचा यलो अलर्ट जारी करण्यात आला आहे. त्याचबरोबर अमरावती, भंडारा, चंद्रपूर, गडचिरोली, गोंदिया, नागपूर आणि वर्धा या सर्व जिल्ह्यांत मुसळधार ते अति मुसळधार पावसाची शक्यता हवामान विभागानं वर्तवली आहे. या सर्व जिल्ह्यांना पावसाचा ऑरेंज अलर्ट जारी करण्यात आला आहे. बुलढाणा आणि वाशिम या दोन्ही जिल्ह्यांत कुठलीही पावसाची शक्यता नाही.