Weather Alert: राज्यात आता मुसळधार पावसाचे दिवस, 19 जिल्ह्यांना यलो अलर्ट

गेल्या दोन दिवसांत राज्यातील विविध भागांत जोरदार पावसाने हजेरी लावली आहे. विदर्भातील काही जिल्ह्यांत मुसळधार पाऊस झालाय. तर काही जिल्ह्यांत सतत पावसाची रिपरिप सुरू आहे. 9 जुलै रोजी देखील राज्यातील काही भागांत पावसाची शक्यता हवामान विभागानं वर्तवली आहे.

कोकण, पश्चिम महाराष्ट्र, मराठवाडा, उत्तर महाराष्ट्र आणि विदर्भातील काही जिल्ह्यांत तुरळक ठिकाणी मुसळधार पावसाची शक्यता असल्याचं हवामान विभागानं सांगितलंय. पाहुयात 9 जुलै रोजी राज्यात हवामानाची स्थिती कशी राहील.

मुंबईत एक ते दोन ठिकाणी मुसळधार पावसाची शक्यता आहे. पालघर, ठाणे, मुंबई, रत्नागिरी, सिंधुदुर्ग या सर्वच ठिकाणी मुसळधार पावसाची शक्यता असल्यानं पावसाचा यलो अलर्ट जारी करण्यात आला आहे. तर रायगड जिल्ह्यात काही ठिकाणी मुसळधार ते अति मुसळधार पावसाची शक्यता असल्यानं पावसाचा ऑरेंज अलर्ट जारी करण्यात आला आहे.

पश्चिम महाराष्ट्रातील घाटमाथा परिसरात मुसळधार पावसाची शक्यता हवामान विभागानं वर्तवली आहे. पुण्यात मध्यम पावसाची शक्यता असून पुणे घाटमाथा परिसरात मुसळधार ते अति मुसळधार पावसाची शक्यता आहे. त्यामुळे पावसाचा ऑरेंज अलर्ट जारी करण्यात आला आहे. कोल्हापूर घाटमाथा आणि सातारा घाटमाथा परिसरात मुसळधार पावसाची शक्यता असल्याने पावसाचा यलो अलर्ट जारी करण्यात आला आहे.

मराठवाड्यातील छत्रपती संभाजी नगर, जालना, परभणी, हिंगोली, नांदेड या सर्व जिल्ह्यांत तुरळक ठिकाणी विजांच्या कडकडाटासह आणि वादळी वाऱ्यासह हलक्या ते मध्यम स्वरूपाच्या पावसाची शक्यता आहे. त्यामुळे पावसाचा यलो अलर्ट जारी करण्यात आला आहे. इतर उर्वरित जिल्ह्यांत हलक्या ते मध्यम स्वरूपाच्या पावसाची शक्यता आहे.

उत्तर महाराष्ट्रातील धुळे, नंदुरबार, जळगाव या जिल्ह्यांत विजांच्या कडकडाटासह आणि वादळी वाऱ्यासह हलक्या ते मध्यम स्वरूपाच्या पावसाची शक्यता असल्यानं पावसाचा येलो अलर्ट जारी करण्यात आला आहे. तर नाशिक घाटमाथा परिसरात मुसळधार ते अति मुसळधार पावसाची शक्यता असल्यानं पावसाचा ऑरेंज अलर्ट जारी करण्यात आला आहे. नाशिक आणि अहिल्यानगर या दोन ठिकाणी हलका ते मध्यम स्वरूपाच्या पावसाची शक्यता आहे.

विदर्भातील नागपूर, भंडारा, गडचिरोली, गोंदिया या जिल्ह्यांत विजांच्या कडकडाटासह आणि सोसाट्याच्या वाऱ्यासह मुसळधार पावसाची शक्यता असल्यानं पावसाचा येलो अलर्ट जारी करण्यात आला आहे. तर चंद्रपूर जिल्ह्यांत मुसळधार ते अति मुसळधार पावसाची शक्यता असल्यानं पावसाचा ऑरेंज अलर्ट जारी करण्यात आला आहे. अकोला, अमरावती, वर्धा, वाशिम, बुलढाणा आणि यवतमाळ या जिल्ह्यांत कुठल्याही पावसाची शक्यता हवामान विभागानं वर्तवली नाही.