Weather Alert: पुढील 4 दिवस महाराष्ट्रासाठी चिंतेचे! पुन्हा मुसळधार पाऊस, हवामान विभागाचा अलर्ट

कोकण, मध्य महाराष्ट्र, मराठवाडा आणि विदर्भात अनेक ठिकाणी जोरदार तर काही ठिकाणी मुसळधार पावसाची शक्यता हवामान विभागाने वर्तवली आहे.

28 ते 31 ऑगस्ट दरम्यान राज्यात जोरदार पावसाचा अंदाज आहे. पाहुयात 28 तारखेला राज्यात हवामान कसं असेल.

मुंबई शहर आणि उपनगरात अनेक ठिकाणी मुसळधार पावसाचा अंदाज हवामान विभागाने वर्तवला आहे. मुंबईबरोबरच ठाणे, पालघर, रायगड, रत्नागिरी आणि सिंधुदुर्ग जिल्ह्याला पावसाचा यलो अलर्ट देण्यात आला आहे.

पुणे, अहिल्यानगर, नाशिक, जळगाव, धुळे, नंदुरबार या जिल्ह्यांना देखील यलो अलर्ट देण्यात आला आहे. विजांच्या गडगडाटासह आणि ताशी 30 ते 40 किमी वाऱ्यासह जोरदार पावसाची शक्यता या भागात आहे.

तर घाटमाथ्यावर अतिमुसळधार पावसाचा अंदाज आहे. सातारा, सांगली, कोल्हापूर, सोलापूरमध्ये काही ठिकाणी मध्यम स्वरूपाचा पाऊस होऊ शकतो.

मराठवाड्यात लातूर आणि धाराशिव वगळता जालना, परभणी आणि नांदेड जिल्ह्यात मुसळधार तर संभाजीनगर, बीड, हिंगोली जिल्ह्यात जोरदार पावसाची शक्यता आहे.

विदर्भात सर्व 11 जिल्ह्यांना येलो अलर्ट देण्यात आला आहे. भंडारा, गोंदिया, गडचिरोली आणि चंद्रपुरात मुसळधार तर विदर्भातील उर्वरित जिल्ह्यांमध्ये जोरदार पावसाची शक्यता आहे.