Weather Alert: पुढील 24 तास धोक्याचे, राज्यात या ठिकाणी मुसळधार पाऊस, हवामान विभागाकडून अलर्ट

कोकण आणि विदर्भात मुसळधार पावसाचा इशारा भारतीय हवामानशास्त्र विभागाने दिला आहे. नागपूर, भंडारा आणि गोंदिया या जिल्ह्यांना पुढील काही तासांसाठी अति मुसळधार पावसाचा इशारा भारतीय हवामानशास्त्र विभागाने दिला आहे.

पूर्व विदर्भातील उर्वरित जिल्ह्यांमध्येही मुसळधार पावसाची शक्यता आहे. पाहुयात पुढील 24 तासांमध्ये राज्यांमध्ये हवामानाची स्थिती कशी असेल.

कोकणातील रायगड आणि रत्नागिरी जिल्ह्याला हवामान विभागाने यलो अलर्ट दिला असून या जिल्ह्यांमध्ये तुरळक ठिकाणी मुसळधार पावसाची शक्यता आहे, तर कोकणातील मुंबई, ठाणे, पालघर आणि सिंधुदुर्ग या जिल्ह्यांमध्येही मध्यम स्वरूपाचा पाऊस होऊ शकतो.

नाशिक, धुळे, जळगाव, अहिल्यानगर आणि नंदुरबार या जिल्ह्यांमध्येही भारतीय हवामानशास्त्र विभागाने जोरदार पावसाचा इशारा दिला आहे.

तर पश्चिम महाराष्ट्रातील सर्व जिल्ह्यांमध्ये तुरळक ठिकाणी मध्यम स्वरूपाच्या पावसाची शक्यता भारतीय हवामानशास्त्र विभागाने वर्तवली आहे.

मराठवाड्यातील पावसाचा जोर 10 जुलै रोजी ओसरल्याचे पाहायला मिळणार आहे. मराठवाड्यातील सर्व आठ जिल्ह्यांमध्ये तुरळक ठिकाणी हलक्या ते मध्यम पावसाची शक्यता हवामान विभागाने वर्तवली आहे.

पूर्व विदर्भात मात्र पावसाचा जोर कायम राहण्याची शक्यता आहे. नागपूर, भंडारा, गोंदिया, गडचिरोली आणि चंद्रपूर या पाच जिल्ह्यांना हवामान विभागाने ऑरेंज अलर्ट जारी केला आहे, तर उर्वरित सर्व जिल्ह्यांना यलो अलर्ट जारी केला आहे.