Weather Alert: राज्यात पावसाचा जोर वाढणार, रविवारी मुसळधार पाऊस, हवामान विभागाचा अलर्ट

राज्यात पावसाचा जोर पुन्हा एकदा वाढण्याची शक्यता आहे. कोकण आणि मुंबईत पुढील दोन दिवस मुसळधार पावसाचा अंदाज आहे. तर मराठवाडा, विदर्भातील जिल्ह्यांत देखील जोरदार पावसाची शक्यता आहे.

उत्तर महाराष्ट्रात देखील काही जिल्ह्यांत मुसळधार पाऊस होऊ शकतो. पाहुयात 6 जुलै रोजी राज्यात हवामानाची स्थिती कशी असेल.

मुंबई वगळता कोकणातील सर्व जिल्ह्यांना ऑरेंज अलर्ट देण्यात आला आहे. तर मुंबईला यलो अलर्ट देण्यात आला आहे. सह्याद्रीच्या घाट भागात मुसळधार पावसाचा इशारा हवामान विभागाने दिला आहे.

पश्चिम महाराष्ट्रातील पुणे, सोलापूर, सातारा, सांगली आणि कोल्हापूरमध्ये तुरळक ठिकाणी हलक्या ते मध्यम स्वरूपाचा पाऊस पडेल.

उत्तर महाराष्ट्रात धुळे, नंदुरबार आणि जळगावमध्ये तुरळक ठिकाणी मुसळधार पावसाची शक्यता आहे. या जिल्ह्यांना हवामान विभागाने यलो अलर्ट दिला आहे. तर मराठवाड्यात देखील पावसाचा जोर वाढणार आहे.

जालना, छत्रपती संभाजीनगर, परभणी, हिंगोली, नांदेड आणि बीडमध्ये जोरदार पावसाची शक्यता आहे. या सहा जिल्ह्यांना यलो अलर्ट देण्यात आला आहे.

विदर्भात देखील पावसाची शक्यता वर्तवण्यात आली आहे. नागपूर, चंद्रपूर, वर्धा, भंडारा, गोंदिया आणि गडचिरोलीत मुसळधार पावसाची शक्यता वर्तवण्यात आली आहे. विदर्भातील या सहा जिल्ह्यांना यलो अलर्ट देण्यात आला आहे.