Weather Alert: राज्यात रविवारीही मुसळधार पाऊस कोसळणार, 17 जिल्ह्यांना अलर्ट

गेल्या तीन दिवसांपासून राज्यातील विविध भागांत पावसाने जोर धरला आहे. काही जिल्ह्यांमध्ये मुसळधार पाऊस तर काही ठिकाणी हलक्या ते मध्यम स्वरूपाच्या पावसाची सतत धार सुरू असल्याचं दिसून येत आहे. मात्र 27 जुलै रोजी राज्यात पावसाचा जोर गेल्या तीन दिवसांच्या तुलनेत काहीसा कमी होणार असल्याचा अंदाज हवामान विभागाने वर्तवला आहे.

काही भागांमध्ये हलक्या ते मध्यम स्वरूपाचा पाऊस तर काही ठिकाणी मुसळधार पावसाची शक्यता हवामान विभागाने वर्तवली आहे. काही जिल्ह्यांना यलो तर काही जिल्ह्यांना ऑरेंज अलर्ट जारी केला आहे. पाहुयात 27 जुलै रोजी राज्यातील हवामानाची स्थिती कशी राहील.

मुंबईत तुरळक ठिकाणी मुसळधार पावसाची शक्यता हवामान विभागानं वर्तवली आहे. त्याचबरोबर पालघर, ठाणे, रत्नागिरी आणि सिंधुदुर्ग जिल्ह्यांमध्ये तुरळक ठिकाणी मुसळधार पावसाची शक्यता आहे. या भागांसाठी यलो अलर्ट जारी करण्यात आला आहे. तर रायगड जिल्ह्यात मुसळधार ते अति मुसळधार पावसाचा इशारा देण्यात आला असून, हवामान विभागानं ऑरेंज अलर्ट जारी केला आहे.

पश्चिम महाराष्ट्रातील पुणे, कोल्हापूर, सातारा, सांगली आणि सोलापूर जिल्ह्यांत हलक्या ते मध्यम स्वरूपाच्या पावसाची शक्यता आहे. पुणे आणि सातारा घाटमाथ्यांवर मुसळधार ते अति मुसळधार पावसाचा अंदाज असून ऑरेंज अलर्ट जारी केला आहे. कोल्हापूर घाटमाथ्यावरही मुसळधार पावसाची शक्यता असल्याने यलो अलर्ट देण्यात आला आहे.

मराठवाड्यातील छत्रपती संभाजीनगर, जालना, परभणी या जिल्ह्यांमध्ये वादळी वाऱ्यांसह हलक्या ते मध्यम पावसाचा अंदाज आहे. बीड, हिंगोली, नांदेड, लातूर, धाराशिव या जिल्ह्यांमध्ये फक्त हलक्या स्वरूपाचा पाऊस होण्याची शक्यता आहे. उत्तर महाराष्ट्रातील धुळे, नंदुरबार, नाशिक, जळगाव, अहिल्यानगर या जिल्ह्यांत हलक्या ते मध्यम स्वरूपाचा पाऊस पडण्याची शक्यता आहे. तर नाशिक घाटमाथ्यावर मुसळधार पावसाचा अंदाज असल्यामुळे यलो अलर्ट जारी करण्यात आला आहे.

विदर्भातील अकोला, अमरावती आणि बुलढाणा जिल्ह्यांमध्ये वादळी वाऱ्यांसह विजांच्या कडकडाटासह मुसळधार पावसाची शक्यता आहे. तर चंद्रपूर, गडचिरोली, गोंदिया, नागपूर, वर्धा, वाशिम, यवतमाळ या जिल्ह्यांमध्येही वादळी वाऱ्यांसह आणि विजांच्या कडकडाटासह पावसाचा इशारा देण्यात आला आहे.

27 जुलै रोजी पावसाचा जोर काहीसा कमी असला तरीही काही भागांमध्ये मुसळधार पावसाचा अंदाज कायम आहे. त्यामुळे शेतकऱ्यांनी पिकांचे संरक्षण करण्यासाठी योग्य ती खबरदारी घ्यावी. तसेच नागरिकांनी आरोग्याची काळजी घ्यावी. प्रशासनाने दिलेल्या सूचनांचे पालन करावे, असे आवाहन प्रशासनाकडून करण्यात येत आहे.