सावधान! भाड्याच्या घरातही लागू होतात वास्तू नियम; घराचा कोपरा न कोपरा 'असा' करा दोषमुक्त

आजच्या काळात नोकरी किंवा व्यवसायानिमित्त अनेकांना भाड्याच्या घरात राहावे लागते. भाड्याचे घर असल्यामुळे आपण त्यात हवी तशी तोडफोड किंवा मोठे बदल करू शकत नाही. जर त्या घरात वास्तू दोष असेल, तर त्याचा परिणाम आपल्या प्रगतीवर, आरोग्यावर आणि घरातील शांततेवर होतो. मात्र, वास्तू शास्त्रानुसार काही छोटे आणि प्रभावी उपाय करून आपण भाड्याच्या घरातील नकारात्मकता दूर करू शकतो.

मुख्य प्रवेशद्वारावर स्वास्तिक आणि 'ॐ' चे महत्त्व: वास्तू शास्त्रानुसार घराचे मुख्य द्वार हे ऊर्जेचे प्रवेशद्वार असते. भाड्याच्या घरात शिरताना सर्वात आधी मुख्य दरवाजाच्या दोन्ही बाजूंना सिंदूराचा वापर करून स्वास्तिक काढावे आणि मध्यभागी 'ॐ' चिन्ह लावावे. हे चिन्ह लावल्याने घरातील नकारात्मक ऊर्जा प्रवेशद्वारावरच थांबते आणि सकारात्मक ऊर्जेचे आगमन होते. यामुळे घरातील सदस्यांचे बाहेरील लोकांशी असलेले संबंध सुधारतात.

उत्तर दिशेला मिठाची वाटी ठेवा: मीठ हे नकारात्मक ऊर्जा शोषून घेण्याचे सर्वात मोठे साधन मानले जाते. घराच्या उत्तर किंवा ईशान्य दिशेला एका काचेच्या वाटीत खडे मीठ भरून ठेवावे. उत्तर दिशा ही कुबेराची दिशा मानली जाते. येथे मीठ ठेवल्याने घरातील आर्थिक अडथळे दूर होतात आणि वातावरणातील जंतू व नकारात्मक लहरी नष्ट होतात. हे मीठ दर 15 दिवसांनी बदलून नवीन भरावे.

ईशान्य कोपरा स्वच्छ आणि मोकळा ठेवा: घराचा ईशान्य कोपरा हा देवस्थान मानला जातो. भाड्याच्या घरात अनेकदा या कोपऱ्यात अडगळ किंवा जड वस्तू असतात, ज्यामुळे मानसिक तणाव वाढतो. हा कोपरा नेहमी स्वच्छ, हलका आणि मोकळा ठेवावा. येथे पाणी भरलेला कलश किंवा छोटा गंगाजलाचा कलश ठेवल्याने घरातील मुलांचे अभ्यासात लक्ष लागते आणि आरोग्य सुधारते.

बेडरूममध्ये दक्षिण-पश्चिम दिशेचे ध्यान: भाड्याच्या घरात बेडची दिशा चुकल्यास पती-पत्नीमध्ये वाद किंवा निद्रानाशाचा त्रास होऊ शकतो. झोपताना आपले डोके नेहमी दक्षिण किंवा पूर्व दिशेला असावे. नैऋत्य कोपऱ्यात बेड ठेवल्याने स्थिरता येते. जर या कोपऱ्यात काही दोष असेल, तर तिथे जड वस्तू किंवा अलमारी ठेवावी, ज्यामुळे घराचा आधार मजबूत होतो.

टेबलवर हिरवे रोप ठेवा: तुमच्या वर्क डेस्कवर किंवा घराच्या उत्तर-पूर्व भागात छोटे हिरवे रोप ठेवा. हिरवा रंग हा बुधाचा कारक आहे. कामाच्या ठिकाणी हिरवे रोप ठेवल्याने बुद्धी तल्लख होते आणि करिअरमध्ये प्रगतीच्या संधी मिळतात. हे रोप कृत्रिम नसावे.

घरात काय बदल जाणवतील: हे उपाय भाड्याच्या घरातही वास्तुदोष कमी करू शकतात. नकारात्मक ऊर्जा नाहीशी होते, संपत्ती टिकून राहते, आरोग्य सुधारते, नातेसंबंध मजबूत होतात आणि कामावर एकाग्रता वाढते. घरात सकारात्मक भावना वाढतात, ज्यामुळे जीवनात आनंद आणि शांती येते. टीप : (वरील माहिती सामान्य माहितीवर आधारीत आहेत. न्यूज 18 मराठी याची पुष्टी करत नाही. आपला उद्देश तुमच्यापर्यंत माहिती पोहोचवण्याचा आहे.)