6 की 7 मार्च, संकष्टी चतुर्थी कधी? अचूक तारीख, वेळ आणि पूजेची पद्धत आत्ताच करा नोट

मार्च 2026 मधील संकष्टी चतुर्थी 6 मार्च 2026 रोजी साजरी केली जाणार आहे. फाल्गुन महिन्यातील या चतुर्थीला 'भालचंद्र संकष्टी चतुर्थी' असे म्हटले जाते. या दिवशी बाप्पाची पूजा केल्याने जीवनातील सर्व संकटे दूर होऊन सुख-समृद्धी लाभते, अशी भाविकांची श्रद्धा आहे.

का आहे खास?: फाल्गुन महिन्यातील संकष्टी चतुर्थी अत्यंत शुभ मानली जाते. 'भालचंद्र' रूपातील गणपतीची पूजा केल्याने मानसिक शांती मिळते आणि रखडलेली कामे मार्गी लागतात. विशेषतः ज्यांना करिअर किंवा शिक्षणात अडचणी येत आहेत, त्यांच्यासाठी हे व्रत वरदान मानले जाते.

तारीख आणि वेळ:पंचांगानुसार, फाल्गुन महिन्याच्या कृष्ण पक्षातील चतुर्थी तिथी 06 मार्च 2026 रोजी संध्याकाळी 07 वाजून 53 मिनिटांनी सुरू होईल. या तिथीची समाप्ती 07 मार्च 2026 रोजी संध्याकाळी 07 वाजून 17 मिनिटांनी होईल. संकष्टीचा उपवास चंद्रोदयाला सोडला जात असल्याने, शुक्रवारीच हे व्रत पाळले जाईल.

उपवास कधी सोडावा?: संकष्टी चतुर्थीचा उपवास रात्री चंद्रदर्शन आणि चंद्राला अर्घ्य दिल्यानंतरच सोडला जातो. 06 मार्च रोजी चंद्रोदयाची वेळ रात्री 09 वाजून 12 मिनिटे असल्याने या वर्षी मार्च महिन्यातील संकष्टी चतुर्थीचे व्रत 06 मार्च 2026 रोजी साजरे केले जाईल.

कशी करावी पूजा?: सकाळी लवकर स्नान करून व्रताचा संकल्प करावा. देवघरात गणपतीची मूर्ती स्थापित करून तिला लाल फुले, शेंदूर आणि 21 दुर्वांची जोडी अर्पण करावी. बाप्पाला प्रिय असलेले मोदक किंवा लाडू नैवेद्य म्हणून दाखवावेत. यावेळी 'ॐ गं गणपतये नमः' या मंत्राचा जप किंवा संकटनाशन स्तोत्राचे पठण करावे.

चंद्राला अर्घ्य देण्याची पद्धत: रात्री चंद्रोदय झाल्यावर एका कलशामध्ये पाणी घेऊन त्यात अक्षता आणि फुले टाकावीत. चंद्राचे दर्शन घेऊन त्याला अर्घ्य द्यावे. त्यानंतर गणपतीची आरती करून प्रसाद ग्रहण करावा आणि उपवास सोडावा.

या गोष्टी टाळाव्यात: संकष्टीच्या दिवशी कोणाबद्दलही वाईट बोलू नये किंवा वाद घालू नये. तसेच, उपवासाच्या अन्नात कांदा, लसूण किंवा तामसिक पदार्थांचा वापर टाळावा. केवळ सात्त्विक आहार किंवा फलाहार करावा. टीप : (वरील माहिती सामान्य माहितीवर आधारीत आहेत. न्यूज 18 मराठी याची पुष्टी करत नाही. आपला उद्देश तुमच्यापर्यंत माहिती पोहोचवण्याचा आहे.)