T20 World Cup : वेस्ट इंडिजविरुद्ध सूर्याने 'ब्रम्हास्त्र' बाहेर काढलंच नाही, टॉसआधीच टीम इंडियाची मोठी चूक!

टी-20 वर्ल्ड कपमध्ये आतापर्यंत दक्षिण आफ्रिका, इंग्लंड आणि न्यूझीलंड या 3 टीम क्वालिफाय झाल्या आहेत. तर चौथ्या स्थानासाठी भारत आणि वेस्ट इंडिज यांच्यात लढत आहे. या सामन्यात जी टीम जिंकेल त्यांचा सेमी फायनलमध्ये प्रवेश होईल.

वेस्ट इंडिजविरुद्धच्या या करो या मरो सामन्याआधी टीम इंडियाचा कर्णधार सूर्यकुमार यादवने टॉस जिंकून पहिले बॉलिंगचा निर्णय घेतला आहे. झिम्बाब्वेविरुद्ध खेळलेली टीमच या सामन्यात खेळणार आहे, टीममध्ये कोणताही बदल केलेला नाही, असं सूर्याने टॉसवेळी सांगितलं.

भारत आणि वेस्ट इंडिज यांच्यात टी-20 वर्ल्ड कपच्या इतिहासात आतापर्यंत 4 सामने झाले आहेत, यातल्या एकाच सामन्यात भारताचा विजय झाला तर 3 सामने वेस्ट इंडिजने जिंकले. भारत आणि वेस्ट इंडिज यांच्यात टी-20 क्रिकेटच्या इतिहासात 30 सामने झाले, यातल्या 19 सामन्यात भारताचा आणि 10 सामन्यांमध्ये वेस्ट इंडिजचा विजय झाला.

वेस्ट इंडिजच्या टीमला स्पिन बॉलिंगसमोर खेळताना अडचणी येतात हा इतिहास आहे. वेस्ट इंडिजविरुद्ध कुलदीप यादव हा भारताचा सगळ्यात यशस्वी बॉलर ठरला आहे. कुलदीपची गुगली वेस्ट इंडिजच्या खेळाडूंना समजत नाही, हेदेखील बऱ्यावेळा दिसून आलं आहे, पण त्याला महत्त्वाच्या सामन्यात टीम इंडियामध्ये संधी मिळाली नाही.

कुलदीप यादवने वेस्ट इंडिजविरुद्ध टी-20 आंतरराष्ट्रीय क्रिकेटमध्ये 9 सामन्यांमध्ये 13.41 च्या सरासरीने आणि 6.33 च्या इकोनॉमी रेटने 17 विकेट घेतल्या आहेत. कुलदीप यादव हा वेस्ट इंडिजविरुद्ध सर्वाधिक विकेट घेणारा भारतीय खेळाडू आहे.

भारताची प्लेइंग इलेव्हन : अभिषेक शर्मा, संजू सॅमसन (विकेट कीपर), इशान किशन, सूर्यकुमार यादव (कर्णधार), हार्दिक पांड्या, तिलक वर्मा, शिवम दुबे, अक्षर पटेल, अर्शदीप सिंग, वरुण चक्रवर्ती, जसप्रीत बुमराह