Hong-Kong Fire : ...आणि पाहाता पाहाता 5 इमारतींना पेट घेतला, हा कोणताही सिनेमा नाही; हाँगकाँगमधील घटनेचे भयानक Photo

हाँगकाँगच्या ताई पो जिल्ह्यातील एका उंच निवासी इमारतीच्या संकुलनात बुधवारी भीषण आग लागली. या दुर्घटनेत चार लोकांचा मृत्यू झाला आहे आणि त्यामुळे अनेक जण इमारतीत अडकले होते, अशी माहिती अधिकाऱ्यांनी दिली. माहितीनुसार या संकुलनातील पाच इमारतींना आग लागली आहे. सुरुवातीला पोलिसांनी आठ जण जखमी झाल्याचे सांगितले होते, परंतु नंतर मृतांचा आणि जखमींचा आकडा वाढला.

हा आकडा आणखी वाढणार असल्याची शक्यता आहेत. कारण या आगीने खूपच भीषण रुप घेतलं आहे.

या मृतांमध्ये एका अग्निशमन दलाच्या जवानाचा समावेश असल्याची अनधिकृत बातमी आहे, पण त्याला अधिकृत दुजोरा मिळालेला नाही. या आगीत आणखी तीन जण जखमी झाले, जरी पोलिसांच्या सुरुवातीच्या अहवालात आठ बळींची नोंद होती. या विसंगतीचे कारण अद्याप स्पष्ट झालेले नाही, असे सीएनएनने वृत्त दिले आहे.

या आगीने बांधकामासाठी बिल्डिंगला लावलेले बांबू आणि बांधकाम जाळ्यांना (construction netting) पूर्णपणे वेढले होते, जे इमारतीच्या बाहेरील बाजूने लावले होते. यामुळे आकाशात धुराचे लोट आणि उंच ज्वाला उसळत होत्या आणि या आगीने रौद्र रुप घेतल्याचं दिसत आहे.

थेट फुटेजमध्ये अग्निशमन दलाचे जवान शिडीच्या ट्रकचा वापर करून वरून तीव्र ज्वाला विझवताना दिसत आहेत.

संध्याकाळच्या वेळी लागलेल्या या आगीला अग्निशमन दलाने तात्काळ 'नंबर 4 अलार्म'वर (दुसरी सर्वोच्च तीव्रता पातळी) श्रेणीसुधारित केले. पोलिसांनी सांगितले की, आग लागलेल्या इमारतींमध्ये अनेक लोक अडकल्याच्या अनेक तक्रारी मिळाल्या होत्या.

वृत्तसंस्था एपीने अधिकाऱ्यांच्या हवाल्याने सांगितले की, आगीचा भडका निवासी संकुलातील अनेक इमारतींमध्ये पसरला होता. घटनास्थळावरील फुटेजमध्ये कमीत कमी पाच लागून असलेल्या ब्लॉकला आग लागलेली दिसत होती आणि अनेक अपार्टमेंटच्या खिडक्यांमधून ज्वाला बाहेर येत होत्या. नोंदीनुसार, या इमारतीत 2,000 पेक्षा जास्त फ्लॅट्स असलेले आठ निवासी टॉवर आहेत.

हाँगकाँग सरकारने दिलेल्या माहितीनुसार, जखमींना उपचारासाठी रुग्णालयात दाखल करण्यात आले आहे. जखमींपैकी दोघांची प्रकृती चिंताजनक असल्याचे सांगण्यात आले, तर तिसऱ्याची प्रकृती स्थिर आहे.

हाँगकाँगमध्ये बांधकाम आणि नूतनीकरण स्थळांवर बांबू वापर मोठ्याप्रमाणात केला गेला आहे. परंतु सुरक्षिततेच्या कारणास्तव या वर्षाच्या सुरुवातीला सरकारने सार्वजनिक प्रकल्पांमधून ते टप्प्याटप्प्याने बंद करण्याची घोषणा केली होती.