मंगळावर सोनंच सोनं! नासाच्या शास्त्रज्ञांचेही चमकले डोळे, पृथ्वीवर आणणार कसं?

नासाचा पर्सिव्हरेन्स रोव्हर मंगळावर सतत आश्चर्यकारक खुलासे करत आहे.  हे रोव्हर जेझेरो क्रेटर नावाच्या ठिकाणी फिरत आहे, जे खूप पूर्वी एक तलाव होतं पण आता ते कोरडं आहे. गेल्या डिसेंबरपासून रोव्हर विच हेझेल हिल नावाच्या उंच उतारावर काम करत आहे.

Space.com मध्ये प्रकाशित झालेल्या अहवालानुसार, गेल्या काही महिन्यांत रोव्हरने 5 खडकांचे तुकडे गोळा केले, 7 खडकांची कसून तपासणी केली आणि 83 खडकांवर लेझर चाचण्या केल्या.

रोव्हरला 'सिल्व्हर माउंटन' नावाचा एक खास दगड सापडला. हा कदाचित सुमारे 3.9 अब्ज वर्षे जुने असेल, जेव्हा मंगळावर अनेक उल्कापिंड पडले होते. रोव्हरने त्याच्या एक्स अकाउंटवर लिहिलं की, हा खडक आतापर्यंत पाहिलेला सर्वात अनोखा आहे.

दक्षिण कॅलिफोर्नियातील नासाच्या जेट प्रोपल्शन लॅबोरेटरीमधील पर्सिव्हरन्स प्रकल्पातील शास्त्रज्ञ केटी मॉर्गन यांनी एका निवेदनात म्हटलं आहे की, जेझेरो क्रेटरचा पश्चिम भाग शास्त्रज्ञांसाठी सोन्यासारखा आहे. इथं असे खडक सापडले आहेत, जे खूप पूर्वी मंगळाच्या खोलीतून बाहेर आले होते. हे उल्कापिंडाच्या आघातामुळे झाले असावे, ज्यामध्ये जेझेरो क्रेटर तयार करणाऱ्या उल्कापिंडाचाही समावेश आहे.

शास्त्रज्ञांना हे खडक पृथ्वीवर आणायचे आहेत. पण हे काम सोपं नाही. या मोहिमेसाठी खूप पैसा आणि वेळ लागेल. नासा यासाठी योजना आखत आहे.