Pooja Khedkar: पूजा मॅडमचा कारनामा आईला भोवला; आता कंपनीच काढली विकायला?

पुणे: वादग्रस्त आय.ए.एस अधिकारी पूजा खेडकरच्या अडचणीत दिवसेंदिवस वाढ होताना दिसत आहे. हे कमी होत की काय त्यातच आता त्यांच्या कुटुंबियांच्या नावे पिंपरी चिंचवड शहरात असलेल्या कोट्यवधी रूपयांच्या कंपनीचा देखील आता लिलाव केला जाणार आहे. नेमका या कंपनीचा लिलाव का केला जात आहे, कंपनीत नेमकं काम चालायचं?

धक्कादायक बाब म्हणजे ही कंपनी मागील अनेक वर्षापासून बंद आहे. त्यामुळेच कंपनीकडे लाखो रुपयांच्या कर थकल्याने ती सिल करण्यात आली. मात्र एवढ्यात न थांबता खेडकर कुटुंबीयांनी कराची रक्कम निर्धारित वेळेत न भरल्यास या कंपनीचा लिलाव करणार असल्याचं महापालिकेच्या कर संकलन विभाग प्रमुखांनी स्पष्ट केल आहे.

एकीकडे पूजा खेडकर यांच्या आईच्या नावे असलेल्या या कंपनीचा लिलाव करण्यासाठी महापालिकेच्या कर संकलन विभागाने हालचाली सुरू केल्या आहेत. तर दुसरीकडे पूजा खेडकर यांनी पिंपरी चिंचवड महानगरपालिकेच्या वायसीएम रुग्णालयातून घेतलेल्या अपंग प्रमाणपत्रच नियम बाह्य पद्धतीने दिल्या गेल्याचे आरोप झाल्याने त्याची देखील उच्च स्तरीय चौकशी केली जात आहे.  या संदर्भातली चौकशी केलेला अहवाल थेट दिल्ली दरबारी म्हणजे देशाच्या दिव्यांग कल्याण मंत्रालयाकडे पाठवला जाणार असल्याची माहिती स्वतः आयुक्तांनाच दिली आहे.

त्यामुळे एकीकडे कर न भरल्यास पूजा खेडकर यांच्याशी संबंधित असलेल्या या कंपनीचा लिलावा होईल, तर दुसरीकडे खेडकर यांनी वायसीएम रुग्णालयातून मिळवलेल्या अपंग प्रमाणपत्राच्या चौकशीत कोणी दोषी आढळलं तर त्याचं उत्तर देखील पूजा खेडकर यांना द्यावं लागणार आहे. त्यामुळे पूजा खेडकर यांचा पाय आता आणखी खोलात जाताना दिसत आहे.