PM Modi Birthday: सगळं आसमंत झालं 'मोदीमय', पुणेकरांनी पहिल्यांदाच अनुभवला हाच तो 1000 ड्रोनचा शो VIDEO

हा शो पाहण्यासाठी हजारोंच्या संख्येने नागरिक मैदानावर जमले होते. आकाशात एकाच वेळी झेपावलेल्या हजार ड्रोननी जे दृश्य निर्माण केले, ते पाहून प्रत्येकजण थक्क झाला. या ड्रोन शोमध्ये भारतीय संस्कृती, इतिहास आणि आधुनिक भारताची वाटचाल या सर्व गोष्टींचा सुंदर संगम दिसून आला.

शोदरम्यान प्रथम संत परंपरेचे दर्शन घडले. संत ज्ञानेश्वर माऊली आणि संत तुकाराम यांच्या प्रतिमा ड्रोनच्या माध्यमातून उभ्या राहिल्या. त्यानंतर समाजसुधारक महात्मा जोतिराव फुले यांचा संदेश आकाशात साकारला गेला. मराठी मातीचा अभिमान असलेले छत्रपती शिवाजी महाराज, देशासाठी लढलेले लोकमान्य टिळक आणि भारतीय संविधानाचे शिल्पकार डॉक्टर बाबासाहेब आंबेडकर या सर्वांचे प्रतिबिंब आकाशात झळकले.

इतिहासाबरोबरच आधुनिक भारताचे प्रतीक मेक इन इंडिया या लोगोची झलकही ड्रोननी दाखवली. याशिवाय अयोध्येतील राम मंदिराचे दर्शन, तसेच 2047 सालच्या विकसित भारताच्या संकल्पनेचे चित्रण या शोमधून प्रेक्षकांसमोर आले. या प्रत्येक कलाकृतीकडे लोकांनी मंत्रमुग्ध होऊन पाहिले.

ड्रोनच्या माध्यमातून एकामागोमाग एक प्रतिमा साकारताना नागरिकांच्या चेहऱ्यावरचा आनंद आणि अभिमान स्पष्ट जाणवत होता. भारताची संस्कृती, परंपरा, इतिहास आणि भविष्याची स्वप्ने या सर्वांचा संगम या शोमध्ये पाहायला मिळाला. त्यामुळे मोदींना दिलेली ही वाढदिवसाची भेट खरोखरच अद्वितीय ठरली.

या शोमध्ये ऑपरेशन सिंदूरची प्रतिकृतीही पाहायला मिळाली. महाराष्ट्रात यापूर्वी अशा स्वरूपाचा ड्रोन शो झाला नव्हता. त्यामुळे अनेकांसाठी ही एक नवीन आणि अविस्मरणीय अनुभूती होती. लहान मुलांपासून ते ज्येष्ठ नागरिकांपर्यंत सर्व वयोगटातील लोकांनी उत्साहाने पाहिला आले होते.

पुणेकरांसाठी हा एक ऐतिहासिक क्षण ठरला. अनेकांनी आपल्या मोबाईल कॅमेऱ्यात या अविस्मरणीय दृश्यांची नोंद करून ठेवली. सोशल मीडियावर देखील ड्रोन शोची छायाचित्रे आणि व्हिडिओ व्हायरल झाले. पंतप्रधान मोदींना शुभेच्छा देण्यासाठी केलेली ही अभिनव कल्पना केवळ पुण्यातीलच नाही तर संपूर्ण महाराष्ट्रातील नागरिकांसाठी एक प्रेरणादायी ठरली.