MHADA Pune: पुणेकरांनो, हक्काच्या घराचं स्वप्न होणार साकार! प्रतीक्षा संपली, म्हाडाची मेगा सोडत 'या' दिवशी

यापूर्वी ऑक्टोबर आणि डिसेंबरमध्ये ही सोडत निघणे अपेक्षित होते. मात्र, आधी महापालिका आणि त्यानंतर जिल्हा परिषद निवडणुकीची आचारसंहिता लागू झाल्याने ही प्रक्रिया वारंवार लांबणीवर पडली. म्हाडाने राज्य निवडणूक आयोगाकडे विशेष परवानगी मागितली होती, परंतु ती मिळू शकली नाही. आता आचारसंहिता संपत असल्याने, म्हाडा पुणे मंडळाचे सभापती शिवाजीराव आढळराव पाटील यांनी १० फेब्रुवारीचा मुहूर्त निश्चित केला आहे.

सप्टेंबर महिन्यात या घरांसाठी नोंदणी सुरू झाली होती. पुणे मंडळाच्या २० टक्के सर्वसमावेशक योजना आणि १५ टक्के एकात्मिक योजनेतील या ४,१८६ घरांसाठी तब्बल २ लाख १५ हजार अर्ज दाखल झाले आहेत. गेल्या पाच महिन्यांपासून अनामत रक्कम म्हाडाकडे जमा असूनही निकाल लागत नसल्याने अर्जदारांमध्ये मोठा रोष होता. समाज माध्यमांवरून म्हाडाच्या कारभारावर टीकाही झाली. आता सोडतीची तारीख निश्चित झाल्याने अर्जदारांना मोठा दिलासा मिळाला आहे.