पुणेकरांच्या पैशांची उधळण! 2 कोटीचे कपडे 9 वर्षांपासून धूळ खात पडले, असा उघड झाला 'प्रताप' अन् 20 अधिकाऱ्यांना दणका

महाराष्ट्र नवनिर्माण सेनेचे (मनसे) नेते हेमंत संभूस यांनी हा प्रकार उघडकीस आणला होता. महापालिकेने 2015-16 च्या सुमारास चतुर्थ श्रेणी कर्मचाऱ्यांसाठी गणवेश, साड्या आणि इतर साहित्य खरेदी केले होते. यासाठी कंत्राटदारांचे २ कोटींहून अधिक रुपयांचे बिलही अदा करण्यात आले. मात्र, हे साहित्य संबंधित कर्मचाऱ्यांपर्यंत पोहोचवण्याऐवजी वडगाव बुद्रुक येथील सावित्रीबाई फुले अभ्यासिकेत साठवून ठेवण्यात आले आणि प्रशासन ते वाटण्यास विसरले.

महानगरपालिका आयुक्त नवल किशोर राम यांनी या तक्रारीची दखल घेत अतिरिक्त आयुक्त ओमप्रकाश दिवटे यांची चौकशी अधिकारी म्हणून नियुक्ती केली होती. दिवटे यांनी सादर केलेल्या अहवालात तक्रारीतील तथ्य समोर आलं आहे. 9 वर्षे उलटल्यामुळे आता या कपड्यांची अवस्था खराब झाली असून ते वापरण्यायोग्य राहिलेले नाहीत. या प्रकरणी जबाबदार असलेल्या २० कर्मचाऱ्यांवर कारवाईची टांगती तलवार आहे. यामध्ये काही निवृत्त अधिकाऱ्यांचाही समावेश असून त्यांनाही नोटीस बजावण्यात आली आहे.