Atharva Sudame : "..तर रिल्स स्टार्सचा 'गेम' होणार! अथर्व सुदामेच्या 'त्या' रीलनंतर पुण्यात PMPML चा मोठा निर्णय

पीएमपीचे अध्यक्ष आणि व्यवस्थापकीय संचालक पंकज देवरे यांनी दिलेल्या आदेशानुसार, आता पीएमपी बसमध्ये कोणत्याही प्रकारचे फोटो, व्हिडिओ शूटिंग किंवा रिल्स तयार करण्यास अधिकृत बंदी घालण्यात आली आहे. विशेष म्हणजे, प्रशासनाची पूर्वपरवानगी न घेता असे चित्रीकरण केल्यास आता थेट गुन्हे दाखल केले जाणार आहेत.

केवळ बाहेरील व्यक्तीच नव्हे, तर पीएमपीचे चालक आणि वाहकही आता रडारवर आहेत. सेवेवर असताना गणवेशात किंवा ई-मशिनचा वापर करून व्हिडिओ बनवणे किंवा रिल स्टार्सना सहकार्य करणे, हा शिस्तभंगाचा प्रकार मानला जाईल. अशा कर्मचाऱ्यांवरही कडक प्रशासकीय कारवाई करण्याचे निर्देश देण्यात आले आहेत.

काही दिवसांपूर्वी अथर्व सुदामे याने पीएमपी बसमध्ये एक रील शूट केले होते. या व्हिडिओमध्ये पीएमपीचा गणवेश, ई-तिकिटिंग मशीन आणि बॅज यांसारख्या अधिकृत मालमत्तेचा वापर करण्यात आला होता. या रीलमध्ये प्रवाशांना दाखवण्याची पद्धत आक्षेपार्ह असल्याचा दावा करत पीएमपीने अथर्वला कायदेशीर नोटीस बजावली होती. महामंडळाच्या प्रतिमेला धक्का बसल्याचे कारण देत हा नवीन नियम लागू करण्यात आला आहे.