Purandar Airport: पुरंदर विमानतळ गेमचेंजर ठरणार, मुख्यमंत्री फडणवीस यांचा मोठा निर्णय

पुरंदर विमानतळ प्रकल्पामुळे बाधित होणाऱ्या सात गावांतील ग्रामस्थांशी मुख्यमंत्री देवेंद्र फडणवीस यांनी संवाद साधला. पुरंदर येथील विमानतळ महाराष्ट्र आणि पुणे जिल्ह्याच्या विकासासाठी महत्त्वाचा ठरणार असल्याचे त्यांनी सांगितले. विमानतळ प्रकल्प राबवताना सर्व बाबींचा विचार केला जाईल. या प्रकल्पासाठी संपादित करण्यात येणाऱ्या जमिनीसाठी शेतकऱ्यांना योग्य आणि जास्तीत जास्त मोबदला देण्याबाबत निर्णय घेतला जाईल, असेही मुख्यमंत्री फडणवीस यांनी स्पष्ट केले.

प्रकल्पामुळे बाधित होणाऱ्या कुटुंबांच्या पुनर्वसनात कुटुंबाची रचना लक्षात घेतली जाणार आहे. कुटुंबातील सज्ञान मुलांसाठी अतिरिक्त जागा देण्यात येणार असून, बहिणींच्या हिश्याबाबतही योग्य तो मार्ग काढला जाईल. अल्पभूधारक आणि भूमिहीन शेतकऱ्यांसाठी वेगळे पर्याय देता येतील का, याचाही विचार करण्यात येणार आहे. पुरंदर विमानतळासाठी संपादित होणाऱ्या जमिनीसाठी मोबदल्यासोबतच पर्यायी जमीन देण्यात येणार असून, असा उपक्रम राज्यात प्रथमच राबवला जाणार असल्याचे मुख्यमंत्र्यांनी सांगितले.