महादेवाचे अद्भूत मंदिर, जे दिवसातून 2 वेळा होते गायब! यामागचं नेमकं रहस्य काय? 

या मंदिराशी संबंधित अनेक पौराणिक कथा आहेत. त्यापैकी एक कथा तारकासुरचा अंत आणि स्तंभेश्वरची स्थापना आहे. एकेकाळी तारकासुर नावाचा एक शक्तिशाली राक्षस होता. त्याने आपल्या कठोर तपश्चर्येने भगवान शिवाला प्रसन्न केले. भगवान शिवाने त्याला वरदान मागण्यास सांगितले. तारकासुराने अमरत्वाचे वरदान मागितले पण भगवान शिव म्हणाले की, हे शक्य नाही. मग तारकासुराने असे वरदान मागितले की, त्याचा वध फक्त शिवाच्या मुलाकडूनच होऊ शकतो आणि त्या मुलाचे वयही फक्त सहा दिवस असावे. भगवान शिवाने त्याला हे वरदान दिले.

वरदान मिळाल्यानंतर तारकासुर अहंकारी झाला. त्याने देव आणि ऋषींना त्रास देण्यास सुरुवात केली. त्याच्या अत्याचारांनी त्रस्त होऊन सर्वजण भगवान शिवाकडे गेले आणि तारकासुरला मारण्यासाठी प्रार्थना केली. भगवान शिवाने त्यांची प्रार्थना ऐकली आणि श्वेता पर्वतकड्यातूल सहा दिवसांचे बाळ कार्तिकेय जन्माला आले. कार्तिकेयाने तारकासुरचा वध केला पण जेव्हा त्याला कळले की तारकासुर हा शिवाचा भक्त होता, तेव्हा त्याला खूप दुःख झाले.

कार्तिकेयाला त्याच्या कृत्याचा पश्चाताप झाला. त्याने भगवान विष्णूंना प्रायश्चित्ताचा मार्ग विचारला. भगवान विष्णूंनी त्याला ज्या ठिकाणी त्याने तारकासुरला मारले होते, तिथे शिवलिंग स्थापित करण्याचा सल्ला दिला. कार्तिकेयाने तेच केले. त्याने तिथे एक सुंदर शिवलिंग स्थापित केले. हे ठिकाण पुढे स्तंभेश्वर म्हणून प्रसिद्ध झाले. आजही कार्तिकेय त्या शिवलिंगाला पाणी अर्पण करण्यासाठी येतो, असे मानले जाते. या मंदिराच्या अदृश्य होण्यामागे एक नैसर्गिक कारण आहे. हे मंदिर अशा ठिकाणी आहे जिथे मोठी भरती येते. समुद्रात भरती येते तेव्हा मंदिर पाण्यात बुडते. जेव्हा ओहोटी येते, तेव्हा पाण्याची पातळी कमी होते आणि मंदिर पुन्हा दिसते.