Ram Navami: ‘श्री राम जय राम...’, मंत्र एक, फायदे अनेक! त्रयोदशाक्षरी तारक मंत्र माहितीये का?

धार्मिक अभ्यासक प्रभा माने (बोरिवली) यांच्या माहितीनुसार, 'श्री राम जय राम जय जय राम' हा त्रयोदशाक्षरी मंत्र राम भक्तांसाठी अत्यंत प्रभावी मानला जातो. समर्थ रामदास स्वामी यांनी या मंत्राचा 13 कोटी वेळा जप करून त्यानंतरच कार्यास आरंभ केला होता. त्यांनी रामाला सद्गुरू मानले. समर्थ दररोज फक्त पाच घरी भिक्षा मागून त्याचा नैवेद्य श्रीरामाला अर्पण करत. त्यांनी या मंत्राला तारक मंत्र म्हणून सिद्ध केलं. पुढे गोंदवलेकर महाराजांनी हा मंत्र सामान्यांपर्यंत पोहचवण्याचे कार्य हाती घेतले आणि आजही ही सेवा अखंड सुरू आहे.

श्री राम या नावाचा अर्थ देखील खोल आहे – ‘श्री’ म्हणजे माता सीता, ‘रा’ म्हणजे अग्नितत्त्व आणि ‘म’ म्हणजे जलतत्त्व. त्यामुळे या मंत्राचा जप केल्याने शरीर आणि मन दोन्ही शुद्ध होतात, अशी श्रद्धा आहे.

रामनवमी निमित्त भाविकांनी ‘श्री राम जय राम जय जय राम’ या मंत्राचा जप, रामरक्षा स्तोत्राचे पठण करावे. साधनेसाठी तुळशीच्या माळेवर जप करावा. आसन घालून, मन एकाग्र करून मंत्रजप करत बसावं. या दिवशी साधना केल्याने घरामध्ये सकारात्मक ऊर्जा निर्माण होते. विद्यार्थी, नोकरवर्ग आणि सर्वांना फलश्रुती प्राप्त होते.