Smriti Mandhana : याला म्हणतात लीडर! अंगात 103 डिग्री ताप तरीही मैदानात उतरली स्मृती मानधना, RCB ला जिंकून दिली ट्रॉफी

विमेन्स प्रीमियर लीगच्या फायनल मॅचमध्ये आरसीबीची कॅप्टन स्मृती मंधाना हिने दाखवलेले शौर्य आता क्रिकेट चाहत्यांसाठी चर्चेचा विषय ठरलं आहे. 4 फेब्रुवारी रोजी स्मृतीला 103 डिग्री इतका प्रचंड ताप होता आणि तिची प्रकृती अत्यंत खालावली होती. मात्र, आपल्या टीमला विजेतेपद मिळवून देण्यासाठी तिने या आजारावर मात करत मैदानात उतरण्याचा धाडसी निर्णय घेतला. 103 डिग्री ताप असताना देखील तिने रणनिती आखली अन् आरसीबीला जिंकवलं. तापापामुळे तिला फिल्डिंग करताना नीट वाकताही येत नव्हतं, आणि तिला खूप अशक्तपणा जाणवत होता, त्यामुळे बक्षीस वितरण समारंभापूर्वी ती बहुतेक वेळ डगआउटमध्येच बसली होती.

स्मृतीच्या या जिद्दीने क्रिकेट विश्वात तिचं कौतुक होत आहे. तापात असतानाही तिने ज्या प्रकारे मैदानात धावपळ केली आणि आक्रमक शॉट्स मारले, ते पाहून सर्वच थक्क झाले आहेत. तिच्या या शानदार खेळीसाठी तिला 'प्लेअर ऑफ द मॅच' (POTM) या पुरस्काराने गौरवण्यात आले. आरसीबीच्या या विजयात स्मृतीचा वाटा सिंहाचा राहिला आहे. तिने केवळ स्वतः रन्स केले नाहीत, तर जॉर्जिया वोलसोबत 165 रन्सची महत्त्वाची पार्टनरशिप करत विजयाचा मार्ग सोपा केला. एका बाजूला शारीरिक त्रास असताना दुसरीकडे मानसिक कणखरता दाखवत तिने टीमला चॅम्पियन बनवलंय.

दरम्यान, स्मृती मंधानाची ही खेळी आता डब्ल्यूपीएलच्या इतिहासात आयकॉनिक मानली जात आहे. आरसीबी फॅन्ससाठी हे विजेतेपद खूपच खास आहे, कारण कॅप्टनने स्वतःच्या आरोग्याची पर्वा न करता मैदानात दिलेले हे योगदान अविस्मरणीय ठरले आहे. स्मृतीने सिद्ध केलं की जिद्द असेल तर कोणत्याही संकटावर मात करता येते.