Dawood Ibrahim : अंडरवर्ल्ड डॉन दाऊद इब्राहिमला काय झालं? हॉस्पिटलमध्ये कधीपासून?

नवी दिल्ली, 18 डिसेंबर : अंडरवर्ल्ड डॉन आणि भारतातील मोस्ट वॉन्टेड गुन्हेगार दाऊद इब्राहिम आपल्या शेवटच्या घटका मोजत असल्याचं वृत्त समोर आलं आहे. दाऊद सध्या पाकिस्तानमध्ये लपून बसलेला आहे. तिथे त्याच्यावर कोणीतरी विषप्रयोग केल्याचा दावा करण्यात आला आहे. त्याची प्रकृती बिघडली असून, त्याला रुग्णालयात दाखल करण्यात आलं आहे. माध्यमांनी दिलेल्या वृत्तानुसार, दाऊद इब्राहिमला गेल्या दोन दिवसांपासून कराचीतील रुग्णालयात दाखल करण्यात आलं आहे. त्यामुळे रुग्णालयात कडक सुरक्षा व्यवस्था ठेवण्यात आली आहे. दाऊदला कोणीतरी विष दिल्याचा दावा केला जात असला तरी अद्याप याला अधिकृत दुजोरा मिळालेला नाही. सोशल मीडियावर दाऊदबाबतच्या बातम्या मोठ्या प्रमाणावर व्हायरल होत असून, त्यानुसार विविध प्रकारचे अंदाज बांधले जात आहेत.